Conocido (ex) ciudadano di Aruba deteni na Florida

PALM SPRINGS — Un conocido (ex) ciudadano di Aruba Reinier K, ta deteni na Merca sospecha pa a comete un candela intencional den un cas na Florida. Tabata siman pasa diahuebs cu un encuentro entre amigo a bay robez, cu consecuencia cu un di e amigonan ta morto, kima den su cas. Y ta sospecha cu K. a cende e cas cu e homber Ramon Eduardo Herrera Moradel aden. E grupo tabata den un trailer home, hungando carta, bebe y usa cocaina. 

MAS LAAT

Diabierna marduga, segun informacion policial, e amigonan a bandona e sitio. Tres a bay un bar, K. a bay tambe pero otro direccion, y e amigo Herrera a keda den su auto pasobra e no tabata sinti su mes bon. Un ora despues, Herrera tabata morto, door di hinca di cuchiu, y e cas tabata na candela y K. no tabatey. Dialuna (ayera) polis di condado di Palm Beach Florida, a detene K. (42) di Delray Beach, pa a cende e cas na candela, mientras cu un persona tabata aden.  

KEN TA K.

E sospechoso deteni, ta un persona cu a biba casi full su bida na Aruba, y a bay varios scol den añanan 90. Riba su pagina di Facebook por mira cu el a bay varios scol na San Nicolas y Playa, y despues a drenta servicio militar, prome na Hulanda y despues Aruba. A sigui cu e servicio militar na Merca y a staciona na Iraq tambe. Ta bisa cu su experiencia military a lague mentalmente cu problema. Esey ta splica segun amigonan, cu su actuacion ultimo añanan na Aruba tabata confuso. Algun aña pasa el a haya atencion localmente ora cu el a tribi di mishi cu muraya di KIA pa prueba un punto di con facil ta pa yega e prison. Tambe el a bula di brug di Sonesta, como un stunt.