Aruba ta den TripAdvisors’ Travelers' Choice Top 10 destinations

ORANJESTAD – Oficina di Turismo Aruba (A.T.A.) a ricibi e grato noticia cu e siman cu a pasa, e prestigioso y conocido user review y booking site TripAdvisor a nombra Aruba como e di tres isla mas gusta mundialmente pa cu destinacionnan Caribense. 

A describi nos isla como un isla ehemplar den Caribe na unda den e relato riba e website a añadi cu: “Aruba ta e isla ehemplar den Caribe rondona cu solo, lama y playanan cu santo blanco. Tempo ta pasa poco poco na un manera dushi mientras cu bo ta disfruta di un cocktail tropical of cu bo ta encanta e bista bao lama na unda solamente e piscanan ‘parrotfish’ ta parce di tin pura. E colornan pastel di e edificionan den e capital Oranjestad ta puntonan di referencia y na un manera dibertido e tiendanan ta invita bo pa haci bo compras. Bo por disfruta di e sombra di mata riba Eagle Beach mientras cu e sonido di e olanan for di e awanan blauw ta parce di a wordo crea specialmente pa bo.”

Aki nos por mira cu aprecio y cuido di nos recursonan natural ta primordial no solamente pa e turistanan pa asina mantene nos isla den e top destinacionnan pero tambe pa nos mes y e futuro generacionnan.  

Den e articulo, Aruba ta keda un destinacion popular y ta aparece despues di Jamaica y Puerto Rico entre e islanan mas busca riba e sitio web. Otro destinacionnan menciona tawata Barbados, Punta Cana Republica Dominicana, Grand Cayman Cayman Islands, St. Lucia, Providenciales Turks & Caicos, Guadeloupe y finalmente New Providence Island Bahamas. 

London a wordo nombra como e destinacion cu e miho clasificacion di mundo den e nominacionnan anual di destinacion di ‘TripAdvisor's Travellers’ Choice’.

E ganadornan a wordo determina utilisando varios algorithms cu ta analisa e miyones di comentario y clasificacionnan di hotel, restaurant y atraccionnan tur compila den un solo aña di tur e biaheronan cu ta haci uzo di TripAdvisor mundialmente.

E plataforma online tambe ta menciona cu ta bale la pena pa e bishitantenan explora mas cu solamente e famoso atraccionnan cu un destinacion ta ofrece, ya cu e biaheronan lo haya un experiencia autentico y memorabel cu ta diferencia su mes di e atraccionnan turistico.