Noticianan ‘1 april’ a hala hopi atencion atrobe

ORANJESTAD – E noticianan ayera relaciona cu ‘1 april’ riba NoticiaCla dialuna, a haci su impacto necesario. Y manera custumber, el a genera un buzz mirando e implicacion y tambe a crea tristesa ora cu nos siguidornan a bin compronde poco poco cu tabata un ‘joke’. E tres noticianan cu tabata ‘falso’, tabata esun di e multa pa chauffeurnan intoxica, e bishita internacional riba e asunto di rotonde, y e yegada di un elefante baby for di un pais latino. Di tur tres, esun cu hopi a spera ta berdad, tabata esun di e multa, mientras esun cu mayoria no a pensa mes cu ta un joke, tabata esun di e elefante. Ta un biaha pa aña, NoticiaCla por afford di tin ‘fake news’, mirando e lema ‘noticia cu bo por confia’, ta haci cu nos ta traha mas duro pa sigura cu e informacion ta veridico semper. Pero riba e un dia aki, e ta duna nos espacio pa ‘haci wega’. Asina mes, ta purba crea e noticia di tal forma, cu e ta pone hende duda. Y e biaha aki atrobe a logra. 

MULTA

E noticia cu mas a hala atencion, ta pa e tema di chauffeur intoxica. E noticia tabata cu lo bin cu un ley cu ta multa chauffeurnan intoxica cu 1000 florin cada bez nan wordo ‘gara’ pa polis. Comentarionan manera ‘porfin’, y ‘mi ta spera cu esaki ta berdad’, y mas ainda ‘ aunke cu mi sa cu ta 1 april, e ta un bon idea pa esaki bira realidad’ tabata hopi. NoticiaCla ta spera cu e ‘joke’ aki, por si bira un realidad y cu esnan encarga cu ley, por usa esaki como un ‘hint’ of un ‘push’, pa ainda bin cu e concepto di ley pa por regula e asunto di bebemento y coremento riba nos careteranan. 

ROTONDE

Un otro noticia actual ta e asunto di rotonde, tanto pa e cantidad cu tin, of e forma con ta trahando varios di nan, particularmente esun cu un rand di beton. Aki tambe tabatin hopi comentario  riba e tema, unda cu mas cu tur, tabatin hopi sugerencia di con e ‘instancia internacional’ mester haci pa scapa nos di e tur e problemanan. Ta mas cu claro cu e instancia menciona, no ta existi, y e nombernan usa, ta nombernan fictisio. 

E ELEFANTE

Un forma ‘chistoso’ pa ilustra sinembargo un otro problema serio, ta esun di migracion ilegal. A usa un elefante baby, pa mustra cu hasta nan ta yega Aruba ilegal, y cu hende por usa nan pa genera placa. Atrobe, no tin ningun elefante baby na Aruba, (por lo menos no cu NoticiaCla ta na altura di dje), te pa e ta wordo exploita pa beneficio financiero. Remarcable ta cu esaki tabata e noticia cu mas hende, no a cay ariba como duda si e tabata un ‘joke’ of no. Mayoria di nos siguidornan a kere den esaki, y a sugeri tambe te hasta kico mester haci pa e bestia aki. Na tur, un biaha mas e portal aki por considera e esfuersonan como logra, pa trece poco hilaridad den temponan di stress, den e mundo di noticia. Te otro aña!.