Sentencia Utilities vs Frank Hoevertsz posponi cu un siman

ORANJESTAD – E sentencia den caso entre ex director di Utilities Frank Hoevertsz y su doño di trabou, a keda posponi cu un siman. Asina abogado pa Utilities NV Anthony Ruiz a confirma pa NoticiaCla diamars mainta. E sentencia tabata poni pa awe, 2 di april. E sentencia mester a determina e curso siguiente pa cu directornan di compania di gobierno. Mara na esaki, Parlamento di Aruba a pidi un reunion publico un dia despues, esta mayan 3 di april, pa atende netamente e tema aki y basa riba e sentencia, tuma e siguiente accion. Pero mirando cu e sentencia a keda posponi, a cancela e reunion pa diaranson tambe. 

E CASO

Hoevertsz, despues di 9 aña na cabez di Utilities NV (e compania ‘madre’ di WEB y Elmar), a haya su retiro per direct como director dia 8 di januari ultimo, pero por a keda traha si na e compania, cobra salario y keda cu e auto di compania. Mesora su abogado Johan Sjiem Fat  a cuminsa e proceso pa bringa e retiro, y si por, logra e compensacion manera contracto di su cliente ta stipula. Pero despues di varios intento, partidonan no a haya otro y a bin huez pa determina kico e areglo final mester bira. Segun Utilities mientrastanto, durante e periodo cu Hoevertsz tabata na cabez di Utilities NV, gastonan a subi explosivamente, y a distribi placa. Tur cu aprobacion di e minister encarga cu energia e tempo ey.  Asina abogadonan Anthony Ruiz y Thomas Aardenburg y Ruiz a pleita pa nan cliente Utilities NV. Utilities a opta pa retira Hoevertsz mesora, acusando e como e culpable pa e malgastamento di placa y no maneha un NV di gobierno conforme regla. Como retiro nan ta dispuesto pa dune un suma chikito como salida di e compania si mester, pero si ta pa Utilities, e no ta haya nada. Na final a pidi huez pa dicidi si e practica aki (di e forma con Hoevertsz a maneha e NV) tabata hustifica y si no, kico e ‘castigo’ pa algo asina mester ta. E sentencia awor ta poni pa dia 9 di april, esta otro siman diamars.