Fiscal a pidi 60 ora di trabou comunitario pa ex vocero di OM na Corsou

WILLEMSTAD – Fiscal na Corsou a pidi 60 ora di trabou comunitario pa ex vocero di ministerio publico Norman Serphos. Serphos ta sospechoso den caso di denuncio falso, cu ta un acto castigabel pa ley. E caso a keda trata pa un fiscal di Aruba, pa sigura trato imparcial mirando cu ta trata di algo di Ministerio Publico mes di Corsou. E huez tabata di Corsou, pero uno relativamente nobo (el a cuminsa traha na Corsou na December ultimo y no conoce Serphos) pues por a considera cu e por ta imparcial. 

E CASO

E caso ta uno unda cu Serphos na December lo a haci un denuncia na polis pa motibo cu lo a ‘hack’ su cuenta personal di Facebook. Ta trata di un mensahe deningrante cu e lo a pone riba pagina di un defunto na December. Serphos lo a bisa cu e no a pone esaki pero cu e ta victima di hacking. Pero despues di investigacion a resulta cu e mes lo a pone e mensahe. Mesora OM a suspende Serphos y a pidi pa su retiro. Durante e caso, Serphos a admiti cu el a comete e acto, pero cu el a hacie den un situacion fastioso. E ta lamenta kico el a haci, pero cu ningun hende no a sali perhudica di e caso aki, sino solamente e. Segun Serphos, el a haya cu OM lo a lage na caya den tur esaki. El a pidi pa no tin un castigo pa asina e por sigui haci su trabou como ambtenaar, y no mas na ministerio publico. 

Su abogado ta cuestiona e hecho cu OM no a haci ningun intento pa investiga e menasanan cu tabatin contra su cliente (Serphos),  pero a bay specificamente riba e hecho di e demanda falso. Huez ta dicta sentencia otro siman dialuna merdia 2’or. Potret cortesia Dick Drayer.