Corte a trata caso di apelacion Mitch Henriquez na Hulanda

SCHIPHOL – Corte na Hulanda a cuminsa dialuna mainta cu tratamento di e caso di apelacion den caso penal di Arubiano Mitch Henriquez. Den e caso aki tin dos agente policial como sospechoso. Partner di NoticiaCla, Caribisch Netwerk a raporta e caso. E mama di Henriquez ta na Hulanda tambe pa e caso. E apelacion a keda pidi pa e dos agentenan cu na 2017 a keda sentencia na un castigo di prison condicional di 6 luna, pa maltrato cu consecuencia di morto di Mitch Henriquez na 2015. 

E agentenan ta sigura cu nan a actua segun nan honor y consenshi y no a haci nada malo. Pero e famia no ta kere nan. “Engaño total” e primo Alexandera Dijkhoff a bisa despues di e caso. Tambe e mama Maria no ta convenci. “Nan ta bira tur cos y ta gaña”. Pero e mama no ta cla pa papia dilanti camera ainda. “E ta mucho hopi. Mi no por” e ta bisa yorando. Diaranson ta oportunidad pa e famia papia. E mama ta evaluando pa haci uso di e posibilidad aki. 

TRAUMA

Pa loke ta e agentenan, nan ta bisa cu nan tin trabou. “Mi ta sintimi casi 3 aña y mei den prison y mi ta haya esaki terrible pa tur hende” e polis, identifica solamente como agente DH01 na huez. Ambos polis ta sufri di PTSS, esta disturbio di stress traumatico. 

E famia di Henriquez kier un castigo mas halto. Nan mes no por a bay den apelacio, pasobra nan no ta un partido official den e caso. Dia 19 di juni, huez lo dicta sentencia. 

Autor: Natasja Gibbs