Ley nobo pa multa cada chauffeur intoxica 1000 florin

SAN NICOLAS – Un ley di trafico ta na caminda pa Parlamento e luna aki, cu intencion pa atende cu e problema di accidente di trafico cu tin na Aruba. E ley cu a pasa tur e instancianan legislativo, ta drenta Parlamento e siman aki, y ta programa pa pasa e luna aki mes. E intencion ta pa prome cu mei, esaki drenta na vigor. E ley ta uno basta simple, cu ta stipula cu cada bez un polis haya un automobilista intoxica riba caminda, ta obligue pa paga e multa di 1000 florin, sea via su bancomatico of cash, sino e ta bay cera, te ora cu e cumpli cu e pago aki. Si e wordo gara 3 biaha (3 strikes out), e ta perde su licensia pa 3 aña, y ta wordo registra como un chauffeur alcoholico. E ley aki ta danki na un mocion cu a pasa recientemente durante un reunion publico, y cu a conta cu aprobacion unanime di parlamento di Aruba.