Nacionnan Uni: Islanan den Caribe lo ta prome afecta pa aumento di nivel di laman

NAROBI - Un oficial halto di Nacionnan uni a adverti cu e islanan chikito den Caribe lo ta e prome teritorionan den e region cu lo sufri di e efecto di aumento di nivel di laman, debi na e cambio di clima. Mester bisa si cu no ta haci mencion specifico di cua islanan ta keda afecta. E director ehecutivo di Nacionnan Uni su programa di medio ambiente, Achiem Steiner durante su discurso diasabra na Kenya, diasabra a bisa cu e efecto di e cambio di clima, lo menasa e industria turistico caribense y, eventualmente, su existencia total.

Steiner a papia diasabra, prome cu e publicacion di e di cinco rapport intergubernamental riba cambio di clima. E aumento di nivel di laman lo tin un impacto inmediato den termino economico riba e islanan chikito den desaroyo den Caribe, indicando cu 99% di e structura turistico di e islanan aki, ta ubica riba e zona costeño.

 “Hopi isla chikito ta hopi mas exponi simplemente pasobra nan teritorio ta tin biaha 2, 3 of 4 meter riba nivel di laman” e la bisa. Y pesey, nan existencia ta wordo menasa. Steiner a papia tambe di e impacto cu mas horcan intenso y otro tipo di tempo extremo lo afecta e islanan, cual economia no por maneha e gastonan di eventual reconstruccion. Di otro banda, Steiner a elogia cierto islanan manera Barbados, unda cu esfuersonan ta canando pa inverti den asuntonan sostenibel.