Aruba tabatin ‘solamente’ un hungador den Grandes Ligas di baseball riba ‘opening day’

NEW YORK – Ora cu temporada nobo di baseball Grandes Ligas na Merca a cuminsa ayera, Aruba tabatin ‘apenas’ 1 hungador den circulacion activo. Asina Associated Press a raporta. E articulo ta basa riba e hecho cu tin riba 100 hungador di Republica Dominicano cu tabata activo diahuebs. Nos a bisa den e articulo aki, cu Aruba tin ‘solamente’, si compara esaki cu isla bisiña Corsou cu tin 5, y Republica Dominando cu tin mas di 100 hungador. E unico hungador di Aruba actualmente ta Xander Bogaerts di Boston Red Sox. Mester bisa si cu tin mas hungador di Aruba, den varios liga menor di e ekiponan grandi, cu ta den preparacion pa drenta Grandes Ligas ora cu nan ta cla. Diahuebs tabata e prome dia. E pais cu ta sigui Rep Dominicano ta Venezuela cu 68, sigui pa Cuba (19), Puerto Rico (18), Mexico (8), Japan y Canada (6), Corsou y Sur Corea (5), y Colombia (4). Aruba, Australia, Brazil, Alemania, Lithuania, Hulanda, Nicaragua, Panama, Taiwan y U.S. Virgin Islands cada uno tin 1. Minnesota Twins y Pittsburgh Pirates tin mas hungador stranhero den nan ekipo, cu 14 hungador, sigui pa Chicago White Sox cu 13 y Miami y Tampa Bay cu 11 cada un.