Gobernantenan a atende maestronan cu a marcha contra violencia

ORANJESTAD – Un grupo di mas of menos 75 maestro a marcha bay Parlamento y Bestuurskantoor diabierna atardi pa entrega un manifiesto na gobernantenan contra violencia contra maestro. Esaki ta un reaccion directo riba e incidente cu a tuma lugar mas den siman ora cu un mayor a agredi un maestro na un scol na Aruba. E maestra Xiomara Werleman a tuma riba su mes pa organisa un marcha di maestra pasobra e ta sinti cu e asunto aki no por sosode mas. Gobernantenan a priminti (tanto Parlamento como Gobierno) accion pa otro siman caba, unda cu lo reuni den un commission pa bin cu recomendacion pa pone un fin na e violencia aki. 

WILHELMINA PARK

E grupo di maestro a topa 2’or na Wilhelminapark diabierna pa asina marcha bay prome na Parlamento y despues Bestuurskantoor. Den un reaccion pa NoticiaCla, algun maestro a mustra nan desaprobacion pa e acto obviamente y a bisa cu esaki ta e comienso. E comienso di accion pasobra e mester bira mas grandi. Sindicato SIMAR su presidente tambe tabata presente y a sigura e portal aki cu nan ta sostene e accion aki totalmente aunke nan no tabata envolvi den e parti organisatorio. Pa loke ta Werleman mes, el a bisa cu enberdad e no kier problema cu niun hende, no ta protestando contra gobierno of maestronan, pero simplemente kier pa e violencia contra maestro stop. Pesey no kier a yama esaki un protesta, un accion, pasobra esey ta pone e asunto den un ambiente negativo.

GOBERNANTENAN

Unabez na Parlamento y Bestuurskantoor, e presidente di Parlamento Ady Thijsen a priminti cu lo no keda man cruza y lo keda den contacto. Hunto cu Thijsen, tabatin Parlamentario Sue-Ann Ras y Edgard Maduro, ambos docente di profesion, prome cu nan a bira Parlamentario. Nan tambe a ricibi e manifiesto cu e peticion pa un solucion pronto pa e problema aki. Despues e grupo di maestro a marcha pa Bestuurskantoor unda cu nan a topa cu minister di enseñansa Rudy Lampe, cu a cuminsa na pidi despensa na e maestra agredi (cu tambe a forma parti di e marcha), sra Magda, y despues a sugeri pa forma un commission di maestro, experto riba e tema di seeguridad, y un miembro di gobierno y pa reuni otro siman caba riba e tema. Segun Lampe, e no por a kere loke el a tende kico a sosode. A duna sosten na e grupo y a felicita nan pa e iniciativa di e grupo. E organizador di e marcha, Xiomara Werleman a bisa NoticiaCla na final di e ‘actividad’, cu e ta satisfecho cu e loke a sosode y e cantidad di hende cu a acudi, y tambe e reaccion di gobernantenan. No a pone un fecha si pa e reunion di otro siman si ainda.