- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Europa resistente riba ayudo miyonario pa Venezolanonan na Aruba
BRUSSEL – Parlamentarionan di Aruba ta conta riba 16 miyon euro di ayudo for di Bruselas, pero e Comision Europeo ta desmenti cu ya a papia caba riba sumanan concreto. Aruba ta en busca di ayudo pa recepcion y procedura di asilo politico pa migrantenan Venezolano riba e isla. Comieso di maart, parlamentarionan di Aruba a papia cu e Comision Europeo na Bruselas.
ARUBA TA HAYA MIYONES DI UNION EUROPEO?
“Ta trata di 6 miyon euro pa e aña aki y 10 miyon euro cu ta bin disponibel na 2020” lider di fraccion di MEP Rocco Tjon ta bisa e partner di NoticiaCla, Caribisch Netwerk. Tjon tabata den e reunion cu e Comision Europeo. Di otro banda, Bruselas ta desmenti cu a haci mencion di sumanan concreto durante e combersacionan cu e delegacion di Aruba. “Aruba mester caba su huiswerk prome cu por papia di sumanan”.
E pregunta ta si y ki ora Aruba ta haya e miyonan na placa di ayudo di Union Europeo riba e cuenta bancario. Despues di investigacion, a resulta cu e Comision Europeo no a ricibi e peticion official ainda for di Aruba. Bruselas kier wak un plan riba papel pa dicidi si e plaatchi financiero cu Aruba ta presenta, ta uno realistico of real. Un vocero di e commission a enforsa cu e commission en todo caso ta para cla pa investiga tur peticion official di Aruba. Corsou tambe por pidi ayudo Europeo segun e persona.
CON LARGO LO DURA
E pregunta ta tambe con largo lo dura prome cu Aruba haya e ayudo Europeo unabez cu e papeleo ta cla. “E duracion ta depende di gobierno” Tjon a bisa. “Experiencia ta bisa cu si traha duro, den apenas algun siman cos por ta cla. Esey ta loke nan a bisa nos”. Un vocero di e Comision Europeo sinembargo a bisa di no por haci ningun declaracion riba esey.
E ISLANAN MES TA RESPONSABEL
Aruba y Corsou a indica cu nan no tin suficiente placa pa nan mes sigui trata e yegada y procedura di asilo (politico) di e Venezolanonan. Secretario di Estado Hulandes Raymond Knops anteriormente a bisa caba cu e islanan mes ta responsabel pa esey. E aña aki Corsou a haya 132 mil euro di Den Haag pa mehora e sistema di detencion di stranhero. Tambe e Nederlandse Immigratie- en Naturalisatiedienst (IND) ta yudando e isla cu e distinccion di refugiadonan economico Venezolano cu ta bin na remarke pa asilo.
Autor: John Samson. Fuente: Caribisch Netwerk, partner di NoticiaCla.com
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Follow NoticiaCla
