Maestronan ta marcha awe contra agresion di colega

ORANJESTAD – Un grupo di maestro tin pensa di marcha diabierna merdia, cu e fin pa entrega un manifiesto na minister di enseñansa Rudy Lampe. Motibo pa e marcha pasivo, ta pa na final entrega un carta na gobernantenan contra un incidente cu a pasa e siman aki ora cu un maestro a keda agredi pa un mama di un alumno na St Franciscus College na Playa. E intencion ta pa tur e maestronan acumula pa 2’or na Wilhelmina Park y marcha bisti na blanco, rumbo pa tanto Parlamento como Bestuurskantoor. 

E CASO

Despues di e incidente, e maestra a entrega keho contra e mayor y scol tambe a tuma paso. E maestro ta na cas aworaki, pa recupera di e incidente. No ta conoci ki paso SKOA cu ta maneha e scol, a y lo tuma den e caso aki. Tambe e portal aki tin confirmacion cu sindicato di maestro SIMAR ta na altura di e caso aki y e marcha, pero no ta forma parti di esaki pero a bisa si cu nan ta sostene e causa. 

PASADO

Esaki no ta prome biaha cu maestronan ta vocifera nan preocupacion contra violencia ya cu na april di 2015 a agredi e cabesante di Filomena College Basis. E accion aki a pone cu varios scol na Aruba a protesta den forma di bisti preto, y sindicato SIMAR a yuda, y traha te hasta t-shirt pa e protesta aki. E biaha aki e color ta ta blanco. 

SIMAN

E biaha aki, NoticiaCla a compronde cu SIMAR no ta parti di e accion aki, pero a compronde cu e grupo cu ta protestando diabierna a pidi pa sostene e accion aki. Y manera indica caba, SIMAR ta sostene e causa di e accion aki. NOTA: E potret ta di archivo di NoticiaCla di e accion na 2015 na Filomena College Basis.