Parke Nacional Arikok ta cera e entrada situa na Shete

ORANJESTAD - Parke Nacional Arikok ta cera e entrada situa na Shete. Asina e fundacion a informa den un comunicado diahuebs. Segun e fundacion, esaki ta pa conserva naturalesa.  

Fundacion Parke Nacional Aruba (FPNA) ta den proceso di reorganisacion pa asina bira mas eficiente den su operacion y pa cumpli mihor cu su metanan. Como meta FPNA tin entre otro conserva nos naturalesa, crea posibilidad pa estudio y educacion, conserva lugarnan historico y cultural den e parke y tambe pa ta atractivo pa nos comunidad y turistanan.

Hunto cu e reorganisacion, FPNA tambe ta den proceso di preparacion pa dentro di poco inicia actividadnan grandi pa mantencion di entre otro edificio, infrastructura di caminda, utilidad y comunicacion.

Den cuadro di intensiva nos tareanan pa conserva naturalesa, ta necesario pa cera e entrada di Parke Nacional Arikok na Shete. E aumento di uso di e ruta di ultimo an?anan ta causa molester pa e bario di e entrada di Shete. Pa cu conservacion di naturalesa cada caminda cu tin den parke tin su impacto di entre otro polucion di zonido, stof y sushi. FPNA ta cera e entrada di Shete pa tin un miho control y pa tambe reduci e areanan impacta door di trafico.

E ceramento di e entrada na Shete lo tuma lugar dia 1 april 2019. Door di ceramento definitivo di e entrada na Shete, tur bishitante di parke cu ta bai Conchi, lo mester hasi esaki via e ruta cu ta pasa e Centro di Bishitante (entrada principal) di parke na San Fuego y sigui e ruta cu ta core via sero Arikok pa Conchi.

Den e simannan venidero lo drecha e ruta pa bai Conchi di tal manera cu e ta mas accesibel pa core cu vehiculonan cu ta adequa pa hasi esaki na e velocidad maximo di 20km/ora (regla di parke). FPNA kier pidi cooperacion y comprencion di tur e bishitantenan, tour- y UTV/quadracer operators pa cu e cambio aki, cu lo ta na beneficio di conservacion di naturalesa den e parke.

Pa hasi e cambio aki mas mihor cu ta posibel, FPNA ta opta pa duna un periodo di transicion di dos siman, principalmente pa esnan cu pa un motibo of otro no ta na haltura ainda di e cambio anuncia. Esey ta encera cu park rangers lo keda presente na post na Shete durante e periodo di transicion pa guia e bishitantenan y duna nan e instruccionnan necesario con pa sigui nan caminda.