Tin chens cu den futuro DIMP no ta otorga plachi di number mas

ORANJESTAD – Gobierno mester dicidi si oficina di impuesto lo sigui encarga cu e trabou di otorga plachi di number di auto den futuro cercano. Durante un conferencia di prensa di e departamento diaranson, e directora Luenne Gomez Pieters a sugeri den e direccion ey, indicando cu esey no ta trabou primordial di e departamento. “Loke cu nos tin cu haci, ta cobra impuesto” Gomez a bisa. E ta referi na e problema di logistica cada aña, pa cu e proceso di parti plachi di number. Como tal a bay conseho pa gobierno cu sugerencia con pa remedia e asunto aki. RIba e pregunta di NoticiaCla, cu si esaki kier men cu posiblemente DIMP lo no ta otorgando plachi di number den futuro cercano (posiblemente caba na 2020), Gomez a contesta positivo. 

PROCESO

“Si nos ta expect nos clientenan pa bin busca nan plachinan fisicamente, nos mester ta prepara, nos mester tin lugar grandi caminda bop or otorga e plachinan sin cu e hendenan ta haya su mes den un rij largo, oranan largo ta warda” Gomez a sigui bisa. A tende feedback di contribuyentenan di impuesto pa cuminsa manda e plachinan via post. Aki tambe tin e reto, y ta zona facil pa manda plachi pa post. Pero segun Gomez, kico ta pasa si e plachinan perde den post, of wordo horta y wordo poni riba un auto cu ta wordo usa pa atraco, cu e plachi horta riba bo nomber. Ta cosnan segun Gomez, cu hopi hende no ta para keto ariba ora di comenta. 

SUGERENCIA

Segun Gomez na e portal aki, a sugeri varios momento caba pa haci e cambionan aki. Tabatin consehonan cu a keda skirbi, pa pone no solamente e impuesto di vehiculo di motor den accijns, pero tambe otro posibilidad. Ta bira ora pa nos mesun comunidad cuminsa examina nos consenshi pa wak con ta bay ‘om’ cu nos responsabilidad di impuesto y tambe nos debernan. E problema ta cu mester tuma un decision na nivel politico, pa cual mester tin un ‘draagvlak’, esta sosten amplio politicamente pa por carga e decision aki. Segun Gomez, prome minister Wever a pidi un conseho riba plachi pa 2020, kico ta pensa cu lo por haci. Lo haci esaki proximamente pa despues discuti esaki cu e mandatario. E posibilidad ta cu por hacie pa 2020.