Andrew Hoo ta keda Alto Comisario por lo pronto

ORANJESTAD – E Alto Comisario di polis Andrew Hoo, lo keda den su funcion por lo pronto. Asina NoticiaCla a compronde, y esaki ta nifica cu e periodo cu Hoo tabata stipula pa ta e Alto Comisario ‘temporal’, no ta vence mas 1 april 2019 manera palabra, sino ta keda vigente por lo pronto. Esaki por dura te cu 6 luna si mester. E motibo ta cu e portal aki a compronde cu no a caba cu e proceso di seleccion na tempo, pa por a conseha gobierno pa e candidato cu mester bira e Alto Comisario definitivo. 

COMISION

Manera ta conoci, gobierno a instala un commission cu mester a prepara e proceso di solicitud pa un Alto Comisario nobo. E commission aki ta consisti di e.o. OM, y DRH. Nan lo a informa e minister di husticia cu no a keda cla cu e proceso, y como tal e funcion di Hoo, ta keda ‘status quo’. A compronde cu posibel otro siman por haya e conseho di e commission, pa despues e decision final cay ken ta bira e proximo hefe nobo di polis. 

CANDIDATONAN

For di fuentenan bon na altura, NoticiaCla a compronde cu tin varios hefe actual di polis (hefe di districto etc), cu a solicita pa e funcion. No ta conoci si Hoo mes a solicita pa e funcion aki tambe, of si e ta keda afo. Minister di husticia Andin Bikker no por a bisa e portal aki algun siman pasa, si Hoo enberdad a opta pa bandona Aruba y staciona su mes na Canada. Esaki pasobra si Hoo, cu tabata hefe maximo di polis pa un aña caba, no keda selecciona, e lo ta algo straño ya cu por considera cu ‘diripiente’ e no ta bon mas pa ta hefe. Di otro banda, a compronde cu e stipulacion final pa ta hefe, ta un poco diferente cu ora cu bo bira e hefe definitivo. E portal aki no por a confirma e ultimo aki si.