Rusia: Merca a haya carte blanche pa usa Corsou pa intervencion na Venezuela

MOSCOU – Merca a haya un carte blanche di Hulanda pa usa Corsou como un trampoline pa intervencion agresivo na Venezuela. Asina e vocero di e departamento di relacion exterior Ruso, Maria Zakharova a bisa durante un conferencia di prensa diahuebs. Rusia a tuma nota di e acuerdo firma entre Hulanda, Merca y Corsou pa e ayudo humanitario. “ Den e contexto di e realitanan actual, Den Haag de hecho a duna e Mericanonan un man liber pa usa su ex colonia (Corsou) pa aggression na Venezuela, bou di e pretext di slogan humanitario. 

YEGADA RUSO NA VENEZUELA

Mientrastanto Zakharova a reacciona tambe riba e yegada di e Rusonan cu recientemente a yega Venezuela. Segun Zakharova, e yegada di e soldatnan Ruso recientemente na Venezuela no ta presenta ningun menasa.  E declaracion aki ta bin segun Zakharova, despues cu presidente Mericano Donald Trump a yama Rusia y bisa pa nan retira tur nan trupanan y cu ‘tur opcion ta habir pa logra esey’. “Rusia no ta cambiando e balansa di poder den e region, Rusia no ta menasando ningun hende, no manera cierto oficialnan na Washington” Zakharova a sigui bisa. 

DEAL

E bishita di e Rusonan, tabata como parti di un deal cu Venezuela, y lo permanece eynan te ora cu ta necesario. Dos avion Ruso military a yega Venezuela siman pasa cu casi 100 personal Ruso. Dia 27 di maart 2019, Trump a bisa cu Rusia tin cu bandona Venezuela y ta considera e paso ey uno provocativo.