Aunke a cer'e, hende ta sigui laga bestia atras na Kill Cage

ORANJESTAD – Aunke cu departamento di salud a cera e ‘Kill Cage’ na Wayaca temporalmente pa mejoracion, ainda hende ta lagando bestia eynan. Asina deparatamento di salud a raporta awe mainta. A dicidi cu ta cera esaki entre 22 di maart te cu 07 di april,  y no lo por acepta ningun animal durante e periodo menciona aki. “Awe mainta servicio Veterinario mester a presenta un bes mas pa motibo cu tin animalnan cu a wordo laga atras na e localidad” e departamento a sigui bisa. Departamento di Salud Publico ta conciente cu e animalnan riba caya ta forma molester y esaki no ta un problema di awe pero cu ta bin ta cresiendo desde algun aña caba.

CONCIENTISACION

Comunidad ta desea pa e localidad aki wordo cera permanentemente pero tanten cu no tin un solucion duradero, locual nos ta trahando riba dje, ta dificil cera e localidad aki. 

Na e momento aki e localidad ta cera temporalmente y asina mes nos ta keda encontra animalnan cu ta wordo laga na e localidad. “ Nos ta pidi cooperacion un bes mas na comunidad pa asina nos por keda cla cu e localidad aki lo mas pronto cu ta posibel”