Muchanan contento cu awor nan tin cooler den klas

ORANJESTAD - Scol Preparatorio Washington a keda hopi contento na momento cu nan a wordo sorprendi cu un donashon di 8 watercooler door di Rotary Club of Aruba. Un watercooler pa cada klas y e muchanan tabata super entusiasma cu awor nan tin awa friew den klas sin cu juffrouw mester carga jug cada rato. Juffrouw Rini kende ta cabesante di Scol Preparatorio Washington a splica cu nan ta purba siña e muchanan cu awa ta bon, dushi y hopi saludabel y awor cu e coolernan den klas nan por enfatisa esaki un poco mas. Juffrouw Rini a keda contento cu e gesto aki di Rotary Club of Aruba ya cu di e forma aki tambe nan por siña e muchanan cu tin gruponan cu ta take care di e bienestar di nos comunidad. Juffrouw Sila tambe tabata hopi contento ya cu esaki ta alivia nan trabou un poco tambe ya cu prome mester a carga jug cada rato.

Edsel Lopez, presidente di Rotary Club of Aruba a bisa cu nan a wordo aserca door di Scol Preparatorio Washington cu e petishon si nan lo por aporta cu esaki y unabes cu nan a evalua e petishon a duna e scol 8 cooler cu bon cooperacion di Friomax. Rotary e aña aki ta enfoca extra riba nos muchanan y nan derechonan.