Polis a detene chauffeur cu lo a causa hit & run fatal na Tanki Flip

ORANJESTAD – Polis a detene e chauffeur cu lo a dal un señora y sigui core na altura di Tanki Flip comienso di luna. Vocero di ministerio publico Ann Angela a confirma cu a duna orden di detencion y cu e persona ta deteni y a confisca e auto tambe. Despues di un investigacion rigoroso, porfin diaranson merdia polis a haya autorisacion pa detene e persona aki, cu a resulta di ta un persona femenino latino, nacionalidad Venezolano biba na Aruba. E detencion a tuma lugar dilanti cas di partido AVP na Playa. Polis a detene  dama pues y hibe warda unda cu e tin cu bay responde pa su actonan. Entre nan dal un persona y sigui core, y no responsabilisa su mes pa e actonan aki cu despues a resulta te hasta fatal. 

E CASO

 E caso a tuma lugar dia 3 di maart ultimo ora cu e chauffeur di e nissa tiida a dal un persona y sigui core. E señora alcansa a keda malo y finalmente a fayece siman pasa. Prome cu por a yega asina leu, polis a comparti un video obteni di negoshinan ey banda, cu ta mustra claramente con e auto ta pasa dal e señora di edad y bende y lague eybou. E intencion di e video tabata pa logra haya informacion di pueblo. Mes momento e video a causa rabia y disgusto den comunidad, con hende por pasa dal un persona y sigui core. Fuera di esey, tambe tin e caso unda cu esnan cu tabata core tras di e señora, cu por a wak e suseso, no a para y ta despues di algun auto, cu porfin un chauffeur a dicidi di para wak. NOTA: E auto ta esun cu e chauffeur deteni, lo a usa den e hit & run.