Proceso a cuminsa pa lanta federacion pa Raceway Palo Marga

ORANJESTAD – Despues cu gobierno a cera e pista di Palo Marga algun tempo atras, tin novedad eynan awor. Diamars dos minister di gabinete Wever , Otmar y Dangui Oduber a informa cu e proceso a cuminsa pa lanta un federacion pa Raceway Park Palo Marga. A reuni cu e actornan den e mundo di motorsport pa trata e futuro di Raceway Palo Marga. Segun un comunicado di gobierno, e reunion aki a bay den hopi bon esfera unda e actornan den motorsport a haya e oportunidad pa duna nan input. Tabata tin entre otro lidernan di drag race, motorcross, drifting y go karting. Gobierno a propone pa lanta un federacion cu lo bay dirigi e tereno di Palo Marga. Ora cu e federacion aki keda institui deportenan di motorsport tambe por bin na remarke pa haya subsidio di “Sport Subsidie Aruba” (SSA) via e federacion, asina e Minister Dangui Oduber a duna di conoce. 

 E federacion nobo lo tin e mandato pa organisa eventonan teniendo na cuenta tur reglanan stipula, y lo tin e deber pa mantene e pista tambe.Palo Marga su tereno ta hopi grandi y pesei e federacion nobo lo bay percura pa no solamente organisa evento di drag race, pero tambe otro diciplinanan manera motorcross, drifting y den futuro go Karting.