Bermudez: No tin desicion riba mudansa edificio aduane pa Barcadera

ORANJESTAD -E edificio principal di aduana ta un topico di discusion ainda, pues ya caba ta conoci cu decision a wordo tuma pa muda e waf di container. Logicamente lo mas ideal y segun ley ta pa muda e oficina principal di aduana tambe cerca di e waf.Sin embargo ningun decision no a wordo tuma riba esey ainda. Minister encarga cu aduana, Angel Bermudez durante un encuentro cu personal di douane siman pasa a bisa cu e departamento ta uno hopi importante pa nos, pues e ta na frontera di nos pais caminda cu e ta encarga cu supervision riba productonan y riba materialnan cu ta yega nos isla. “Cualkier plannan futuro lo mester wordo concretisa pa e ‘infra team’ den colaboracion di cuerpo di aduana pa asina yega na un diseño di edificio cu ta pone tambe cu aduana por funciona adecuadamente”.

Aunke cu reunion cu e diferente sindicato ta algo cu e mandatario ta haci mensualmente, despues cu Sindicato Aduanero di Aruba (SADA) vocifera y manifesta e mal contento di e duaneronan di Aruba, e mandatario di finanzas, a percura pa reuni lo mas pronto posibel pa asina nan tambe por splica e motibo tras di e ultimo ‘walk out’ y tambe demas problematica cu ta perhudica nan trabou diario.

Diahuebs ultimo pues miembronan di SADA tabata tin e oportunidad di comparti nan frustracionan den busca di un solucion na e problemanan cu nan ta enfrenta. Entre algun punto di discusion a menciona e situacion actual di e diferente ‘landsbesluit’ cu ainda ta pendiente, e situacion sanitario di e edificio principal di Aduana y algun ekipo necesario pa e duaneronan por eherce nan trabou entre otro.

Despues di a sinta na mesa cu SADA y a scucha varios di e keho di e sindicato, Minister Bermudez a dicidi di haci un bishita na Cuerpo di Aduana na Aeropuerto Internacional Reina Beatrix e diabierna siguiente pa e mes por mira e condicion y papia mas di cerca cu e duaneronan pa nan splica kico ta e problemanan cu ta haci cu nan no por funciona adecuadamente.

“Mi a haya un bon ‘bistaso’ y un bon splicacion di e parti di logistica y infrastructura caminda cu nan a duna nan comentarionan riba con nan ta kere cierto cambionan mester tuma luga pa nan funciona mas miho”, e mandatario a bisa despues di su bishita na aeropuerto.

Bermudez sigur a constata cu ta solamente un mashin di scan ta traha, mientras cu e otro ta wordo uza pa e piezanan como un reemplaso den e mashin cu si ta funciona. Tambe e mandatario ta pensa cu mester tuma na cuenta full e infrastructura y mira con por inverti den e añanan venidero adecuadamente pa asina e miembronan di aduana por haci nan trabou bon.

Tin algun detaye cu por wordo resolvi riba termino corto, segun e mandatario y e ta kere cu un bon comunicacion cu Minister di Turismo y tambe e directiva di ‘Aruba Airport Authority’ lo logra un solucion hopi lihe. Na mes momento tambe tin cambionan cu lo tuma mas tempo manera e sistema di ‘liña’ caminda cu e bishitantenan ta pasa door di duana, esaki sigur lo por wordo modernisa pero lo trece cambio tambe na e ‘booth’ nan y e ekipo necesario pa logra esaki.