Babayigit: Un dia tematico naval ta algo educativo y nobo y necesario

ORANJESTAD – E dia tematico riba laman cu Defensa Hulandes a organisa e siman aki pa partnernan crucial na Aruba (unda cu NoticiaCla tambe a wordo invita pa participa) no ta comun. Asina vocero di marina real Canan Babayigit a splica NoticiaCla. De hecho e prome cu a tuma lugar tabata apenas na Corsou, cu a tuma lugar na December di aña pasa. “Esnan cu nos a invita ta esnan cu nos ta traha hopi cu ne ora cu ta trata asistencia militar” Babayigit a bisa. Esakinan tabata e.o. Koninklijke Marechausee, Warda Costa, KPA (si ta na Aruba), Douane, Ministerio Publico. “Pa nos ta hopi educativo pa tambe ta na Aruba y topa otro personalmente, envez di via telefon of email. E ta algo nobo pa nos” Babayigit a sigui bisa. 

PRENSA

Manera indica NoticiaCla tabata un di e medionan di comunicacion invita, durante e dia tematico aki y segun Babayigit, esaki tin su motibo. Esaki ta algo inusual si mira e grupo di persona cu ta invita y e tipo di informacion cu normalmente ta duna. Pero Babayigit a splica cu tur informacion presenta tabata apto pa tur hende, esta cu tur hende a haya e mesun presentacion, pues prensa invita tambe. “E motibo di tin prensa, ta pasobra nos kier mustra comunidad eyfo, kico e asistencia militar ta encera, y kico tur marina Hulandes ta haci. Nos ta conciente cu como defensa, nos tin un tipo di posicion den comunidad tanto na Aruba y otro islanan di Caribe Hulandes. Y semper ta keda emocionante pa hende wak kico nos como defense ta haci”. Y riba un dia manera dialuna, unda cu a laga hopi cos pa mira, incluyendo demonstracion cu helicopter, un intercepcion di un  boto cu droga. “Pa e comunidad tin biaha e ta net un poco mucho leu di nan bista, y hopi biaha ta restringi pa lesa di e accion solamente den corant. Pero riba un dia manera awe unda cu ta invita prensa tambe, nan ta laga mira kico marina y militarnan ta haci y traha pa bienestar pa comunidad, hunto cu tur e otro partnernan pa hunto nos ta mas fuerte”, Babayigit a bisa finalmente. Ainda no ta posibel pa organisa e dia  tematico riba e otro islanan. Loke si ta haci ta pa segun un di e bapornan mara na e islanan respectivo, duna posiblidad pa un asina yama openhouse, pa e bishitanan por bin abordo y conoce un poco mas di cerca. Pues Aruba y Corsou sigur tabata priviligia di tabatin un presentacion asina. Pero e tin su motibo tambe ya cu ta pa e dos islanan Aruba y Corsou, ta brinda y por brinda asistencia military. Pa St Maarten tin e deseo y necesidad, pero esaki no a tuma lugar ainda y no ta asina avansa den un forma cu por simplifica e proceso di asistencia tambe.