Partnernan strategico di Marina Hulandes a conoci Ms Zeeland mas di cerca

ORANJESTAD –  Proteccion pa nos islanan den Caribe ta un di e tareanan specifico di e bapor di patruyahe Hulandes Ms Zeeland. Periodicamente e ta den e region cu tareanan specifico. Dialuna parternan di Defensa Hulandes, manera KPA, Douane, OM, Gobierno  y dos medio di comunicacion a experencia e dia tematico riba laman pa conoce tur e aspectonan di e bapor fascinante aki. Durante 6 ora largo, prome mara na waf y despues riba laman grandi dilanti Aruba, esnan presente a experencia kico tur e bapor ta capaz di haci, completo cu demonstracion y splicacion. Solamente un area tabata prohibi pa saca potret y of filma, e cobra room, pero lo demas tabata acesible pa tur hende.  

CAPACIDAD DI PROTECCION

Durante un tour abordo di e bapor, a mustra tur faceta di defensa, incluso un demonstracion cu helicopter militar cu a duna un presentacion con ta anda cu asuntonan di droga ora cu captura cierto individuonan riba laman. E cos cu a resalta, ta e forma con defensa Hulandes ta prepara y ekipa cu e meta pa brinda proteccion pa cu nos islanan. E bapor ta staciona periodicamente den nos region Caribense, durante cual e tin tareanan specifico di controla y proteha nos islananan. Durante un periodo specifico di tres luna, e ta forma te hasta parti di Warda Costa di Caribe Hulandes.

DRONES

Un di e puntonan cardinal demonstra, ta e capacidad y necesidad di tin drones como un instrumento di controla areanan specifico, usando e asina yama drone. Drone ta e aparato cu ta bula sin personal, ta mas chikito y ta capaz di vigila sin wordo detecta hopi biaha. NoticiaCla a compronde cu mas y mas nan parti di drones ta wordo usa pa duna asistencia den tur faceta di un operacion militar. Nan ta usa drones commercial, pero debi na nan trabou, nan ta haya permiso special pa bula cu e drones unda cu e persona civil regular no por bula. Unda cu no por usa e helicopter regular naval, nan ta incorpora e uso di un helicopter pa asina haci e trabou di surveillance for di ariba. 

COVERT OPERATION

E parti di asina yama ‘mira sin wordo mira’ osea operacion covert, tambe ta hopi sofistica abordo di e bapor. A splica cu constantemente tin un team specialisa cu e parti aki, unda cu nan trabou ta pa vigila cierto areanan continuamente, usando ekiponan sofistica, cu ta duna nan e posibilidad pa vigila sin wordo detecta. Entre otro ta usa aparatonan manera ‘night vision’ cu ta aparatonan cu ta permitibo wak anochi sin usa luz, detecta movecion di hende y bestia di leu, door di detecta calor di e curpa humano of bestia, pa medio di un aparato special. Di por lo menos 3 km leu di costa, nan ta capas di detecta movecion riba tera, mas ainda esnan cu ta cana den aire liber anochi, scondi den mondi, sin cu e militarnan mes ta wordo detecta. Arma tambe nan tin cu ta necesario como parti di nan proteccion. 

HELICOPTER DEN ACCION

Loke a hala hopi atencion tabata e demonstracion di nan helicopter NH -90, con nan ta detecta un embarcamento di droga riba laman. Loke nan a haci ta simula usando un asina yama ‘go fast’ cu dos persona a bordo, unda cu e helicopter ta intercepta e boto, pone nan para, y ta manda un boto military pa intercepta y detene esnan abordo. E tabata un despliege fascinante di accion cu tur hende presente por a mira den e parti final di e bapor. 

TOUR

Durante e estadia abordo, e partnernan a haya un tour tambe, unda cu por a mira unda e capitan ta navega e bapor, for di e bridge, usando ekiponan super moderno y sofistica, te na e camber Cobra, cu ta asina sofistica cu ekiponan special cu no a permiti pa saca potret ni video den e camber ey pa no identifica e tipo di ekipo abordo. Loke a impresiona tur hende tabata e hecho cu tin te hasta un semi hospital abordo, completo cu docter (dependiendo duracion di biahe) y un enfermero abordo. Un sala di operacion pa duna asistencia medico basico tey, completo cu un camber di hospital cu dos cama. Pero pa situacionan mas avansa, ta usa e helicopter pa transporta e pashent pa tera firme pa mas ayudo. Camber di recreo no a falta cu mes momento ta wordo usa pa un area multifacetico, cu facilmente por wordo cambia pa un facilidad pa atende cu refugiadonan y of material pa refugiado si esey ta necesario. Tambe tin area unda cu por staciona un of mas container completo cu provision necesario, of provision cu ta necesario pa transporta pa destinacionan cu a sufri un of otro disaster of calamidad. 

CUSHINA Y CUMINDA

Loke tambe tabata interesante tabata e facilidad pa cuminda, unda cu esnan presente a haya un almuerzo ofreci, pero e biaha aki no e almuerzo di custumber, completo cu un asina yama cuminda Indones, pero a trece kokinan local abordo cu a prepara un almuerzo netamente local, complete cu su aroz, pan batik, funchi y un stoba di carni. Esnan presente a keda gratamente sorprendi pa e gesto aki. A splica cu normalmente esnan cu come, ta haci esaki den turno, pa asina tur 57 persona (tin biaha 90) abordo por haya chens pa come. No tin cuestion di come y keda sinta, sino ta mas bien como den 15 minuut of menos y sigui pa nan proximo area. Y cada persona tin nan tarea pa por usa e tempo y localidad mas practico.