De Vin: Asistencia militar Hulandes ta bin den varios forma

ORANJESTAD – Asistencia military Hulandes ta bin den varios forma, Asina Comandante di mando naval y Defensa Caribe Peter Jan de Vin a bisa dialuna durante un dia tematico organisa pa parternan strategico abordo di e bapor di patruya Hulandes Ms Zeeland. Base di e presentacion tabata pa splica con a simplifica e forma di duna asistencia militar Hulandes pa Aruba y Corsou. Prome, a splica kico exacto e asistencia militar por consisti di dje.   

TIPO DI ASISTENCIA 

Prome a presenta e tipo di asistencia militar cu por pensa ariba ora cu ta papia di asistencia. Un di e prome forma di asistencia brinda, ta esun conoci como ‘search’, esta e capacidad di busca, unda cu por pensa riba buskeda den cas particular of prison en busca di loke ta necesario. Ta sigui esun di rastrea, esta esnan cu ta busca huellas (sporen) den cuadro di un of otro cas, riba peticion di polis y por pone militarnan pa haci esaki tambe. Un di e casonan cu a usa military tabata aña pasa pa busca e curpa di e criatura Rishandro cu a wordo dera pa su padrastro. Un otro posibilidad ta uso di drones cu pilotonan militar di drone ta usa pa busca riba tera of laman of costa riba instruccion di autoridad local. Esaki ta hopi usa mes, pasobra e ta elimina e risico humano, y tambe ta mas facil pa sconde (compara cu uso di un helicopter). Un punto cu tambe por wordo usa ta observacion statico, esta staciona un grupo di militar un caminda pa observa cierto movecion, sin cu nan ta wordo detecta, osea e ‘mira sin wordo mira’ facilidad. Y finalmente a splica cu por impone uso di buceadornan militar cu por wordo usa si ta mester, si tin cosnan bou di awa cu mester keda localisa of atendi cu ne.