A simplifica e caminda pa asistencia militar Hulandes

ORANJESTAD - E forma di pidi asistencia military Hulandes recientemente a keda simplifica. Comandante di mando naval Hulandes y Defensa Caribe Peter Jan de Vin a duna un splicacion dialuna abordo di Ms Zeeland, e bapor di patruya Hulandes. Esaki a sosode dilanti partnernan strategico cu e biaha aki a inclui NoticiaCla tambe. E simplificacion kier men cu via un proceso hopi mas cortico, e paisnan di Caribe Hulandes por haya asistencia di cierto forma militar. De Vin a splica detayadamente con esaki ta funciona desde 2 aña caba.

ASISTENCIA DURO Y SUAVE

Pa cuminsa, a splica cu tin distinccion den asistencia suave y duro. Un asistencia suave, ta uno cu no ta rekeri arma, y cu e pais mes por haci directo na e Comandante ZeeMacht Caribe, y ta mas bien e tipo cu ta pa rastrea, busca, bucea y uso di drones. Si ta pa algo asina, e ora instancianan manera KPA (polis) of OM (parti huridico ) mes por haci peticion ey. Y mas sigur esaki lo cana un caminda directo y di menos duracion. Un asistencia duro, ta uno cu ta rekeri arma y esey mesora ta bira uno mas serio y cu un caminda mas largo. Esaki ta e caminda ora cu e instancia local tin cu pidi minister di husticia, cu na su turno, ta pidi minister president cu ta pidi Gobernador. Gobernador na su turno ta pidi minister di defensa Hulandes cu ta dicidi y ta pasa e orden pa e hirarchia mas abou. Gobernador sinembargo den e parti nobo, por haci un peticion directo tambe na e Comandante Zeemacht, manera a sosode caba ora di pidi asistencia despues cu horcan a azota St Maarten. 

PAKICO E CAMBIO

Tabata algun tempo pasa cu a bin cu e idea pa simplifica e caminda, mirando e tempo cu ta dura pa un peticion keda aproba, y tambe e tipo di peticion unda cu por tin un cambio sigur. Paisnan a sinta hunto y a bin asina na palabracionan concreto cu a stipula ki ora y pa cua motibo por simplifica e proceso di pidi asistencia militar, y ki ora no. Despues durante e presentacion, a bay den detayes, cua tipo di asistencia militar e islanan (Aruba y Corsou) por haci peticion pe. Lesa otro articulo.