Parlamento Europeo: Hulanda riba lista preto como paraiso fiscal

STRASBURGO – Parlamento Europeo a vota pa pone Hulanda y 4 otro pais Europeo riba e lista preto di paisnan considera como paraiso fiscal. Banda di Hulanda, Luxemburg, Malta, Ierland y Cyprus tambe lo aparece riba e lista. Asina e Parlamento a aproba e mocion di parlamentario Paul Tang (PvdA) pa pone e 5 paisnan aki como paraiso fiscal. Asina e portal Hulandes Algemeen Dagblad ta publica diamars. Union Europeo tin un lista preto pa paisnan considera como paraiso fiscal. Pero esaki ta solamente paisnan pafo di Union Europeo, entre caul Aruba recientemente tambe a keda añadi. Parlamento a aproba un raport di un commission special cu aña pasa a investiga crimenan fiscal y evasion di impuesto. Supuestamente lo tin mas di 900 biyon euro perdi debi na e practicanan menciona. E yamada pa atende cu paisnan di Union  Europeo riba e tema di impuesto fiscal , no ta algo nobo. Na 2017, investigadornan di Universidad di Amsterdam ya caba a pidi esey, ora cu a bin compronde cu Hulanda tabata e parti principal den evasion di impuesto internacional. Di e placa menciona cu a wordo ‘perdi’, 23% lo a pasa via Hulanda. A bisa e ora cu mester haci un distinction entre wafnan di transito manera Hulanda, y e paraisonan fiscal tradicional manera Bermuda y Bahamas.