Huez y fiscal for di Aruba lo trata caso contra ex vocero OM otro siman

WILLEMSTAD – E caso penal contra di ex vocero di ministerio publico di Corsou y St Maarten, Norman Serphos ta bin dilanti dialuna awor, 1 di april na Corsou. Serphos ta wordo sospecha di a haci denuncia falso na polis aña pasa relaciona cu un posting riba su pagina di Facebook. Un denuncia falso asina ta un hecho castigabel pa ley. Loke ta haci e caso aki interesante, ta cu debi na e cercania di e persona cu ley, e proceso completo lo ta den man di Aruba. Esey ta nifica un huez y fiscal for di Aruba lo trata e caso aki den corte na Corsou, manera cu vocero di ministerio publico di Aruba Ann Angela a confirma pa NoticiaCla diamars mainta. 

E CASO

Manera ta conoci, aña pasa December tabatin un bay bin di mensahe riba Facebook, unda cu na prome instante, basa riba un caso, un ciudadano di Corsou lo a post algo contra Serphos como un critica riba un declaracion cu Serphos lo a haci. Despues e ciudadano a bin fayece den un accidente di trafico. Riba e pagina di facebook di e defunto, a aparece un mensahe di Serphos, cu no a cay den bon tera cerca e famia, mirando e circumstancia cu ta cherche cu e persona, mientras cu e ta morto. Serphos mesora a informa cu nan lo a ‘hack’ su cuenta di Facebook y a usa su nomber ya cu e mes no a publica nada. Pa fortifica su ponencia, Serphos a entrega keho di esaki na polis. Despues di un investigacion sinembargo, a bin resulta cu esaki no ta e caso y cu ta Serphos mes lo a publica e mensahe aki. A compronde cu Serphos mes lo a admiti tambe. E hecho aki no a cay den bon tera cerca ministerio publico, cu a suspende Serphos y a pidi su retiro. Despues a dicidi tambe cu e loke a sosode, esta e entrega di keho cu awor a bira uno ‘falso’, esaki mesora a bira un hecho castigabel pa ley. Pero mirando cu ta trata di un persona cu ta den e trabou aki, den ministerio publico, mester garantisa obhetividad total durante e caso. Pesey a dicidi (cu ta custumber) pa laga Aruba su ministerio publico atende e caso aki. Esey kier men cu Aruba su OM ta den control di e caso aki. E ta bay asina leu cu hasta e vocero di ministerio publico di Corsou y St Maarten a haya orden pa ‘referi’ tur pregunta riba e caso, pa e vocero di OM na Aruba. E caso ta tuma lugar dia 1 di april pa 2’or di merdia. Mientras cu tin un castigo mara na e cargo menciona, no ta conoci ki castigo lo pidi den e caso specifico aki. Potret cortesia Dick Drayer.