Dept. Enseñansa: Algun studiante na Hulanda so no a haya placa ainda

ORANJESTAD - “Tin un par di studiante (bou di 10 caso) cu mester a haya nan placa pero pa un of otro rason di comunicacion entre studiante, mentor, Arubahuis y Departamento di Enseñansa no a haya nan pago na tempo of ainda. E casonan aki ta conoci. Ta studiantenan cu tin un prestamo di Hulanda banda di e prestamo di Aruba. Nan no ta sin placa”, asina e director di Departamento di Enseñansa a subraya. Esaki ta reaccion riba e keho publica di e ultimo dianan a publica den cual ,- segun e departamente-, lo ta insinua cu e studiante den exterior ta core riesgo di perde nan aña escolar y lo ta pasa den problemanan financiero sin cu esaki ta haya atencion di instancianan di Gobierno. Departamento di Enseñansa, representa pa su director, Anne-Marie Proveyer–Groot a desmenti e rumornan aki.

“Na prome luga mester bisa cu mayoria studiante na Hulanda tin financiamento di estudio di Hulanda y di Aruba. Tur esunnan cu tin un prestamo di Aruba y a cumpli cu e rekisitonan pa por sigui haya e prestamo ta hayando esaki sin ningun problema y na e manera normal. Den e proceso di tratamento di peticionnan di studiante ta cumpliendo cu e termino di tratamento di peticionnan (cu ta 3 luna)”, asina Anne–Marie Proveyer–Groot ta splica.

Otro cambio cu ta tumando luga banda di e peticionnan pendiente ta e sistema di otorga prestamo extra y pagonan di excepcion pa studiantenan cu ta pidi esaki. “No ta asina cu awendia e prestamo aki ta wordo prolonga automaticamente.  Desde aña 2014–2015 ta aplicando e reglanan manera debe ser y no ta haci excepcion mas. E base pa otorgamento di prestamo ta e contractnan cera entre Land Aruba y e studiante, na cuminsamento di nan estudio. Esaki di un banda ta pa proteha e studiantenan mes y den cuadro di e meta pa traha cu un maneho cu ta cuadra cu Good Governance”, asina Anne-Marie Proveyer–Groot a sigui relata.

Segun Proveyer, studiantenan mester tene nan mes na e rekisitonan cu anualmente nan mester cumpli cune. Un di e exigencianan ta e lista di puntonan. Ya no ta adelanta pago y no ta bay riba palabra, sino mester constata cu e studiante ta studiando di berdad.  E control ta mas severo y ta aplicando e reglanan cu ta conoci pa tur studiante pa añanan caba. Den control haci a bin constata cu tin studiante cu a keda haya fiansa y nan debe a keda crece y ta birando impagabel y mester protege e studiantenan di esaki! Pa preveni tur e gastonan y prestamonan extra, a lanta un taskforce pa analisa  e maneho riba Arubalening. A sugeri cu no por sigui cu e maneho hiba pa e ultimo 27 añanan di Status Aparte. A conseha pa introduci cambionan importante.

Segun Proveyer, gobierno kier sigura cu tur studiante ta haya e oportunidad husto pa yega na un fiansa pa estudio pa por sigui studia sea ta na Aruba mes, na Hulanda, na Merca, den e region of den Latino America. Pero, e studiante tin e responsabilidad di cumpli cu tur rekisito mara na e fiansa y pa sigui haci loke a acorda, esta studia, entrega bo puntonan cada trimester y logra obtene bo diploma den e tempo acorda ora di cera e acuerdo pa e fiansa di estudio.