Segun D.T.I. gran parti di auto na Aruba no ta gekeurd!

ORANJESTAD – Segun Dients Technische Inspectie (DTI), e instancia legal na Aruba encarga cu keurmento di auto, a bisa diabierna cu ‘por bisa cu e gran mayoría di vehiculonan di motor na Aruba no ta gekeurd, e ta inclui e vehiculonan particular y tambe di transporte publico, especialmente V-auto’. Asina nan ta bisa textualmente den un comunicado diabierna atardi, den cuadro di un comunicado pa informa riba e procedura di keur auto na Aruba.

KEURMENTO

Segun DTI, den aña 2018 mas o menos 40% di e vehiculonan di motor di Aruba a wordo gekeurd. Pues segun DTI, “por bisa cu e gran mayoría di vehiculonan di motor na Aruba no ta gekeurd, e ta inclui e vehiculonan particular y tambe di transporte publico, especialmente V-auto.

IMPORTANTE

E ta hopi importante pa keur bo vehiculo di motor, pa motibo cu esaki ta un chekeo pa cu e condición di e vehiculo y ta hisa e seguridad di bo mes, di bo famia, y tambe di otronan. E conseho di DTI ta, pa evita desgracianan innecesario, evita boetnan halto y keur bo vehiculo di motor.

CITA

Orario pa traha cita ta di 7:45 pa 11:30 y di 13:00 pa 15:30. 

Keuring di vehiculo di motor ta di dialuna pa diabierna di 7:30 pa 12:00 y di 13:00 pa 16:00. 

E keuring ta tuma lugar via un cita, paga adelanta. 

Por pidi un cita solamente personalmente na balie di D.T.I.- Barcadera #153. (situa riba caminda di Barcadera Pariba di Arugas)

Pa por haya un cita e cliente mester: 

1.        pasa na balie #2, prome pa traha un cita/afspraak. 

2.        Después pasa na balie #1, e cashier, pa paga 

IMPORTANTE: Trece e siguiente documentonan y informacion pa traha cita: 

•          Registratie formulier DIMP (marca y Vin nr di e vehiculo)

•          seguro valido, 

•          nomber y telefon di e cliente. 

Keuring di e vehiculo.

Riba dia di cita tin cu presenta prome na balie (Balie #3) cu e siguiente documentonan:  

•          Comprobante di e cita, 

•          Keuringsbewijs bieu (si e vehiculo a yega di keur caba),

•          Registratie formulier di DIMP y

•          Comprobante di seguro valido.

IMPORTANTE: No ta permiti pa pasa e vehiculo den e edifcio di keur, prome cu a entrega e documentonan na balie. 

Saka tur pertinencianan di balor (placa, tas, cartera, etc.) for di bo auto prome cu e pasa den e hal di keuring. DTI no ta responsabel pa cu esaki.

Ora di keuring ta wordo controla entre otro e siguiente puntonan: 

1. E datonan di e registracion ta wordo verifica: 

             a. E Vehicle Indentification Number (VIN)

b. E tipo di vehiculo y e tipo di motor (Si e tipo di motor di e vehiculo no ta cuadra  (p.e. ta indica gasoline pero ta diesel) ta exigi pa haci cambio na DIMP prome cu otorga e keuringsbewijs)

            c. Color di e vehiculo.

 Ta controla si tin un seguro valido. Si no tin un seguro valido no ta otorga e keuringsbewijs.

2. Algun puntonan tecnico:

            a.        Brake di pia y handrem

            b.        E mecanismo di stuur y shocks

     c.    E tairanan mester tin groef (min. 1 mm.)

            d.        E motor, muffler y escape di gas (vehiculo cu ta produci hopi huma no ta pasa  keuring)

            e.        E lusnan (lusnan di color no ta acepta)

            f.         E glasnan riba e vehiculo y e wiper (Tint: windshield strook maximal 15 cm. ariba; otro glas min.30%)

            g          E pito, mester ta un solo tono

            h.        E condicion general di e vehiculo y e midinan (4,20 m. halto - 2,60 m. hancho)

            i.          Safety belt, spiel, sientanan, etc.

Unabes cu e vehiculo wordo goedgekeurd un sticker ta wordo duna na cliente pa wordo geplak riba e windshiled na e skina rechts abou. Si pa un motibo of otro e vehiculo wordo afgekeurd e cliente ta haña chens pa drecha e fayo indica pa e keuringsambtenaar dentro di 30 kalenderdagen. E cliente tin 1 chens pa herkeur e vehiculo. Si encaso e bolbe wordo afgekeurd lo mester traha un afspraak di nobo pa bolbe keur e vehiculo completo. 

Tarifanan di keuring ta como lo siguiente:

•          Vehiculo cu un peso menos cu 3500kg ta paga Alf 50,-  

•          Vehiculo cu un peso mas cu 3500kg ta paga Alf 80,- 

y pa cada as extra ta bin acerca Alf 30,-   

•          Duplicaat ta Alf 10,-

•          Overschrijving ta Alf 10,-

•          Registracion ta Alf 5,- si e vehiculo tin un keuring valido y si e vehiculo no ta gekeurd ta paga 50,- pa registracion plus ta haya afspraak pa e vehiculo bin keur. 

 Pa cierto vehiculonan di transporte publico tin exigencianan adicional: 

Por ehempel interior, spare tire, EHBO kit, brandblusser, cantidad di asiento, etc.

Keuring ta tuma lugar conforme stipulacionnan  di Landsbesluit voorschriften voertuigen (AB 1999 nr. 33).