Colegio Arubano: Problema validez diploma mester solucion prome cu fin di aña

ORANJESTAD – Si pa e proximo siman (nan) e incertidumbre riba validez di diploma di Colegio Arubano no keda soluciona, mester implementa un plan B, segun rector di Colegio Arubano Jossy Tromp. Mes momento Tromp a splica NoticiaCla.com cu e siman aki lo por tin un claridad riba e asunto di introduccion di vaknan extra (7 y 8 vak) pa candidatonan di examen di HAVO y VWO. Esaki ta un di e problemanan pa cual e diploma di e scol, lo no por haya e validez cu e mester na Hulanda. Di otro banda, si Aruba no soluciona e asunto aki lihe cu Hulanda (e ta un problema na nivel gubernamental), aki dos aña e alumnonan actual di klas 4 y 5 lo confronta problema cu e reconocemento di e diploma corespondiente.

Tromp a confirma na NoticiaCla.com cu un proposicion formal lo mester keda presenta e siman aki na minister di enseñansa riba e asunto aki. Esey ta despues cu e comision Algemeen Voortgezet Onderwijs (AVO) a reuni dialuna siman pasa y lo a /of ta kedando cla cu e ‘beleidsvoorstel’ pa ‘resolve e problema’, Tromp a sigui bisa. Simultaneamente (NoticiaCla.com a raporta riba esaki anteriormente), a tuma lugar e reunion di mayornan precupa unda cu mas cu 100 mayor a presenta nan precupacionnan riba e tema. Segun Tromp, ta dificil pa bisa si a logra trankilisa e inquietud di e mayornan durante e reunion aunke cu e atmosfera tabata uno basta bon. “Na e mayornan por ripara cu algun ta contento cu e contesta, mientras cu otronan ta keda preocupa pasobra aworaki no tin un proposicion concreto cu por ‘trankilisa’ mayornan cune segun Tromp.

Un di e problemanan cu tin ta cu e asunto no ta den man di Colegio Arubano, sino riba nivel gubernamental. “Instancianan gubernamental, esta departamento di ministerio di onderwijs tin cu trata e asunto aki. E cos aki no ta riba nivel di scol” Tromp a splica. Ta gobierno di Aruba tin cu percura pa e diploma cu wordo otorga despues di tal fecha, tin e garantia cu muchanan por drenta scolnan na Hulanda sin problema. “Riba esey, nan ta trahando e plan pa regla e asunto di e protocol di 2012”.

Tromp no a sconde su frustracion pa e forma con e asunto aki ta wordo atendi. “Nos no ta contento cu e velocidad cu e cos aki ta tumando lugar”. E ta referi na e hecho cu e protocol cu gobierno a firma cu Hulanda tabata na 2012, y 2014 ta cabando y ainda ta puntrando ‘kico a pasa tur esten’. Door di esey, Colegio a ‘pusha, preta y primi’ pasobra nan ta haya pues cu e cos aki no ta bay suficiente rapido.

Si rectorado di Colegio Arubano ripara cu no por logra soluciona e problema di acreditacion di diploma (na tempo), Colegio Arubano mes tin un ‘plan B’ pa evita cu e alumnonan di e scol avansa haya nan mes den problema aki dos aña. Segun Tromp, e plan B ta cla y si mester lo ehecuta esaki prome cu fin di e aña aki ainda. “Mi ta spera cu no mester realisa e plan aki” Tromp a bisa. E plan ta ensera cu tur esunnan cu no a cumpli cu e rekisitonan di añadi vaknan na nan pakete (7 vak pa HAVO y 8 pa VWO), tin cu bay den un programa pa nan por haya e vaknan extra aki. Esey lo rekeri un organisacion gigantesco cu aworaki ta trahando ariba. “Un hala di asunto mester wordo regla y inventarisa, si esaki ta posibel” Tromp a bisa.

Si resulta cu Aruba no keda cla cu Hulanda riba e asunto di validez di diploma, y Aruba haya un ‘no’, mester implementa e plan B aki mas lihe cu ta posibel. “E ta trece hopi problema logistico etc cune y esey tambe ta costa tempo. E plan B aki sinembargo, no por wordo implementa sin mas pa e scol mes, sino cu e mester di un aprobacion di gobierno segun e rector a splica NoticiaCla.com. E problema ta cu pa por implementa e plan aki, mester di medionan financiero, personal y mas. “Si e problema tabata uno facil, nos lo por a hacie awor caba. E ta rekeri cambionan basta drastico den organisacion di e scol aki”. Y ora cu Tromp papia di warda pa implementa plan B, e ta papia di awor. Esta prome cu fin di aña. Y mirando cu nos ta den november caba, ta papia di menos cu 2 luna.