CBS ta actualizando database di adres na Aruba pa Censo 2020

ORANJESTAD - Den cuadro di e trabounan cu mester tuma lugar pa prepara pa e proximo Censo cu lo tuma lugar na luna di oktober 2020, Oficina Central di Estadistica (CBS) ta actualisando nan base di dato di adresnan na Aruba. E base di dato aki ta contene 46.182 adres, di cual 41.820 ta adresnan di vivienda (incluyendo cas, apartamento, trailer, cuarto y combinacion di vivienda y negoshi).

Pa por actualisa e base di dato di adres, dos team di CBS ta coriendo rond den e barionan di Aruba. E teamnan aki ta consisti di un (of mas) personal di CBS y un chauffeur. E teamnan ta haci uso di autonan cu nummerplaat di v-wagen. E autonan ta reconocibel door di e logo di CBS cu ta pega na e portanan na ambos banda di e autonan. Tambe por reconoce e personal di CBS door di un bage cu nan tin bisti.

Nan ta pidi cooperacion di un y tur pa e trabounan cu ta wordo ehecuta door di CBS durante di e lunanan venidero. E actualisacion di e adresnan lo tin un duracion di aproximadamente 4 luna.

Si tin cualkier pregunta por tuma contacto cu Oficina Central di Estadistica  na telefoon: 524-7433. Tambe por manda un e-mail na: cbs@setarnet.aw