Otro siman Schiphol Group ta presenta e CEO nobo di Aeropuerto

ORANJESTAD – Otro siman Royal Schiphol Group ta anuncia ken ta bira e candidato pa proximo CEO di Triple A NV (Aeropuerto Reina Beatrix:red) cu tin cu reemplaza e CEO saliente James Fazio. NoticiaCla a compronde cu e persona aki lo ta un Hulandes, mescos cu tabata e caso anteriormente manera Peter Steinmetz, cu tabata prome cu Fazio. Manera ta conoci e siman aki Fazio a anuncia cu e no ta prolonga su contract y stop fin di augustus 2019. Motibonan duna ta cu ta personal, aunke tin hopi rumor cu ta otro motibo. Mientrastanto aeropuerto mes a emiti su propio comunicado riba e tema. 

SITUACION

E comunicado ta relata e.o. cu Fazio a fungi como e CEO di AAA pa e ultimo 5 añanan y durante e periodo aki, banda di a alcansa diferente logro, a brinda liderazgo y guia pa e proyecto di expansion Gateway 2030 di aeropuerto. Sr. Fazio den e comunicado a comenta riba e “timing” di su decision: “Aeropuerto ta transicionando for di e fase di planiamento pa e fase di construccion di e proyecto Gateway 2030, cu a rekeri e decision dificil pa wak si lo keda 5 aña mas of no, y basa riba motibonan personal, mi deseo ta pa ta mas serca di mi famia y amistadnan y continua cu mi carera bek na New York. 

CANDIDATO NOBO

Segun e comunicado, Royal Schiphol Group a identifica un candidato como e sucesor, y den e proximo siman mas o menos e CEO nobo lo bishita Aruba y lo wordo introduci na e Accionista, Hunta di Supervision, y staf di AAA.  Esaki ta un transicion plania pa permiti un transicion di 4 pa 5 luna, y pa prepara e siguiente CEO debidamente pa e proyecto di construccion cu ta na caminda y pa asina e por asumi e responsabilidad pa lidera aeropuerto. 

ULTIMO 5 AÑADurante su 5 añanan na AAA, e tabata un prioridad pa Sr. Fazio pa sigura e bon relacion y comunicashon habri cu tur partner y pa brinda e mihor liderasgo posibel pa e compania: “Mi kier enfatisa cu di berdad mi a disfruta di mi periodo na Aruba y mi ta agradecido na Gobierno, e partnernan, accionistanan, staf y tur persona cu mi a traha di serca cu ne den un forma hopi profesional y respetuoso. Mi ta sinti mi honra di a ricibi e confiansa pa lidera Aruba su aeropuerto nacional pa e ultimo 5 añanan y mi lo sigui ta 100% comprometi na AAA durante e resto di e temporada cu mi tin akinan, mirando cu nos tin algun milestone importante relata cu e proyecto pa alcansa den e lunanan nos dilanti.” AAA ta gradici Sr. Fazio pa su esfuersonan pa sigui desaroya e aeropuerto cu ta cresiendo y ta desea Sr. Fazio tur cos bon den su siguiente meta profesional.