Actual CEO di aeropuerto no ta extende su contracto di trabou

ORANJESTAD – E director CEO di nos aeropuerto Reina Beatrix, Jamez Fazio lo no extende su contracto cu Triple A NV, y como tal retira na final di esaki na augustus proximo. Minister di Turismo, responsabel pa aeropuerto Dangui Oduber a confirma na NoticiaCla cu Fazio a bise siman pasa cu e ta prefera bolbe Merca y no extende su contracto mas. E contracto lo mester a keda extende pa por lo menos duracion di e proyecto Gateway 2030. Pues awor ainda Fazio lo tabata ‘na tempo’ pa sali si e tabata kier esey. Oduber a confirma cu ta un decision personal di Fazio, y cu e relacion cu e tabatin cu e CEO semper tabata uno bon. Fazio lo yuda ‘werk in’ e proximo director unabez cu esey keda apunta. No ta conoci ken e lo bira. 

DECISION

Segun Oduber, di anja pasa Fazio a tene un combersacion cune caminda a indica cu e aña aki su contract lo termina y e lo mester dicidi si e ta bai keda of e lo bai bek Merca. “ Nos ta na inicio di e proyecto Gateway 2030 cu ta e proyecto mas grandi di infrastructura di nos pais y ta importante pa tur hende ta on board promer cu e groundbreaking official” Oduber a sigui bisa NoticiaCla. E proyecto aki lo dura mas o menos 5 aña. “ Esaki ta nifica cu si Sr Fazio lo tabata tin deseo di keda e lo mester keda at least pa 5 aña mas” Oduber a sigui bisa.  E mandatario a confirma tambe cu den siman aki el a tene un combersacion cu Fazio caminda el a (Fazio:red)  indica cu pa motibonan personal e no ta desea di keda mas sino ta prefera di bai bek merca. “ Su decision ta meramente uno personal cual sigur nos tin cu respeta. Semper gobierno como accionista tawata tin un hopi bon relacion cu Sr Fazio basa riba respet mutuo y a traha semper bon cu otro. Di parti gobierno sigur nos kier a gradici sr Fazio pa su trabounan y contribucion na nos pais y e la sa di haci e airport di Aruba un di e mihornan den henter Caribe” Oduber a sigui bisa. E CEO lo keda algun luna mas pa prepara e siguente CEO.