Wix: Compania ta ofreciendo abogadonan falso pa servicio legal

ORANJESTAD – Recientemente un huez durante un caso den Corte a para un compania y su representante di fungi como abogado pa un cliente. Esaki pasobra e 'supuesto abogado' no ta abogado den realidad y como tal no por practica ley den corte. E caso aki tin atencion tambe di Orden di Abogado, segun e Deken Ronny Wix a confirma na NoticiaCla. A manda nan un carta obligando nan (e compania cu ta ofrece abogadonan falso) pa kita e palabra ‘abogado’ riba nan portal y no por usa nada cu ta refleha abogado. Den pasado recien caba un persona cu a haci mescos, a keda sentencia cu castigo di prison pa a pasa pa abogado y tambe tramitador di permiso. 

COMPANIA

Segun e deken, ta trata di e compania Massimo Consultant & Financial Services NV, cu tin tres persona ta traha y fungi como abogado, di cua un di nan lo a keda castiga caba y a haya basta aña di castigo di prison pa a falsifica documento . E persona aki lo tabata cobra hende hopi placa pa traha permiso y e mes lo tabata falsifica esaki y duna e clientenan. “E ta un problema serio cu tin tur nos atencion. Nos tin contacto cu Hueznan riba e tereno aki y palabracion cu Fiscal Mayor y fiscalnan” Wix a sigui bisa e portal aki. Un cos cu por haci awor, ta alerta hende pa nan ta ta hopi cauteloso ken nan ta usa como abogado y/of tramitador. 

CUANTO HENDE?

E informacion cu Wix como Deken di Orden di Abogado tin, ta cu ta trata di un grupo so cu ta practica esaki, esta Massimo consultant. Nan ta pretende ,segun Wix, di tin abogado na California tambe, pero cu no ta berdad. E potret ta di un oficina di abogado cu no tin nada di haber cu e grupo na Aruba parse segun e Deken. “Nan tin business card y ta traha na un manera hopi sofistica, y con nan ta presenta nan mes” Wix a continua bisando. Nan ta bay pa hendenan ‘suak’, manera Venezolanonan cu ta busca asilo politico, hende cu ta busca permiso di trabou, y cu a cay cera. 

CASO RECIEN

Recientemente tabatin un caso den corte unda cu un compania di seguro conoci na Aruba a hiba un persona corte.  Pero durante e caso, a resulta cu e persona cu mester a defende su caso, a usa un persona di e compania en cuestion , esta sr P. Geerman. Huez a mustra durante e caso, cu e persona en cuestion sea no tabata na altura of no a compronde cu su representante, no ta un representante legal, y como tal no por represente den corte. A mustra e persona cu Corte ta na altura cu e supuesto abogado, no ta un abogado di berdad, y cu como tal e persona mester busca un otro abogado. Huez a pospone e caso pa un luna, esta pa otro siman y asina duna e persona un chens pa busca otro representacion legal. Segun Wix, corte tin registra exactamente ken por y ken no por representa un persona den corte.