Gobierno a contesta companianan di heavy equipment for di diamars

ORANJESTAD – No tabatin ningun deadline stipula cu e grupo di compania di heavy equipment segun minister di infrastructura Otmar Oduber. Asina e ta contradeci declaracion di entre otro e propietario di e compania Cala Romana, Patrick Bossett siman pasa durante un conferencia di prensa. Segun Bosset, a duna gobierno te cu diaranson ultimo 20 di maart pa concretisa e commission cu mester bay evalua e situacion di cobamento di santo. E mandatario a mustra cu diamars atardi caba tur compania a haya un carta cu ta inicia e proceso aki. Aki a mustra e decreto ministerial firma pa e tres ministernan caminda cu a invita diferente grupo cu lo ta participando den esaki.

E DEADLINE

Tabata siman pasa cu un grupo di compania cu ta opera heavy equipment, a duna gobierno (lesa minister Otmar Oduber:red) te diaranson   20 di maart pa bin cu un update riba nan situacion di trabou. Si pa e fecha ey no a haya contesta, por a spera un protesta atrobe, manera a haci biaha pasa, esta posibel blokeo dilanti Bestuurskantoor. Durante un conferencia di prensa, propietario di Cala Romana Patrick Bosset y Werner de Sousa a bisa cu nan no a tende nada mas di minister despues di nan reunion di siman pasa dialuna. 

PROTESTA

Despues di e protesta, e minister dialuna siman pasa a invita un grupo di 6 persona di e grupo di 54 compania y a priminti un solucion. Entre nan, a bisa e representantenan cu nan mester a pidi un aanleg vergunning pa por a continua cu nan trabou di e.o. coba pa santo. Pero un dia despues a bin tende cu nan mester tin un hindervergunning tambe. “E ta mara nos atrobe” de Sousa a bisa. A mustra cu e prijs di material pa construi cas, ta bay subi, si importa material cu no por haya awor, debi cu no por coba mas pa haya e material localmente. A duna un descripcion detaya di tarifa di material y con esaki ta afecta prijs di construccion di cas y otro proyectonan.