Oduber: Un cantidad record di 120 keho a wordo entrega contra ROP

ORANJESTAD – Un cantidad record di 120 persona y instancia a entrega nan obhecion (zienswijze) pa cu e Ruimtelijk Ontwikkelings Plan (ROP) nobo. Asina minister di infrastructura Otmar Oduber a bisa NoticiaCla diahuebs mainta durante un conferencia di prensa. E grupo di persona y of instancia cu a entrega nan zienswijze awor lo haya un carta di DIP cu ta reconoce cu a haya e keho y cu e lo wordo procesa. Lo sea acomoda e keho den e ROP nobo den un capitulo, of lo atende cu esaki den un forma  siguiente manera ley ta prescribi. 

SI NO ACOMODA E CIUDADANO 

Si gobierno no logra acomoda e peticion di e ciudadano den e ROP, ta continua conforme ley un proceso di obhecion (bezwaar), y un proceso di peticion di daño y perhuicio cu por continua. “Kier men e ley ta prescribi exactamente e proceso cu ta wordo encamina na e momento cu un hende entrega zienswijze”. E mandatario a alerta si cu no tur cos ta blanco cu preto. NoticiaCla a puntra e mandatario si gobierno ta compensa e ciudadano den cualkier forma posibel. Esey no ta e caso segun e mandatario. E proceso di e ley ta describe kico tur por sosode. 

COMPENSACION 

Entre otro si e ciudadano a entrega un obhecion caba na 2009 ora cu e ROP anterior a bin na vigor. Si no a haci esey, bo peso di keho awor, of argumento pa entrega uno awor, ta perde peso. Mes momento, no necesariamente argumentonan treci dilanti pa e ciudadano, ta conforme otro ley of reglanan tambe cu automaticamente ta nifica cu un hende tin cu haya daño y perhuicio. “Tur cos ta wordo midi y evalua conforme e leynan existente. Si un hende sintie perhudica, semper e por cana e caminda pa yega na un acuerdo cu gobierno. E acuerdo por ta cu ta intercambia di tereno, ta yega na acuerdo di impuesto, ta cumpra e tereno di e persona etc”.