Un ley cu Aruba tin cu pasa, lo kite di e lista preto di Union Europeo

ORANJESTAD – Aki 6 siman Aruba tin cu demonstra na Union Europeo cu nos isla tin sufficiente mechanismo pa bringa e fenomeno di ‘tax haven’, esta crea un paraiso fiscal pa comercio. Pa haci esaki, gobierno mester pasa un ley mas tarda otro luna, cu ta ‘clear’ nos isla di e problema ey. Ora cu NoticiaCla a publica e primicia di cu Aruba a aparece atrobe riba e lista preto, Gobierno a admiti cu ta pa ‘falta di tempo y capacidad’, no a logra pasa e ley pero no ta pa motibo di prioridad robez. 

E LEY

 E ley cu mester percura pa kita Aruba for di un blacklist mundial fiscal, ta referi na un articulo cu tin cu wordo pasa na April pa na Mei logra kita Aruba di e lista. Asina minister di Finanza Xiomara Ruiz Maduro a bisa NoticiaCla diahuebs mainta. E no ta nada grave segun e mandatario, y cu de hecho e ley ta na Parlamento for di 1 di maart caba. Ta pasa mester pase, pa Aruba por mustra Union Europeo cu Aruba ta cumpliendo.  

PRIORIDAD

Ora cu a puntra e mandatario si ta pa ‘falta di prioridad’ gobierno no a pasa e ley, e mandatario a desmenti esaki. “ E no ta un cuestion di, manera nan ta bisa, prioridad”. E mandatario a mustra cu hopi cos a sosode pareu y como tal simplemente esaki ta un di e cosnan cu no a keda cla. E mandatario a bay bek te na e momento cu a drenta gobierno na November 2017, y unda cu a haya un Bestuurskantoor practicamente desfuncional. Riba dje, a haya situacion di gobierno anterior cu no a atende y cu awor lo a perhudica Aruba. Ta trata e ley fiscal pa San Nicolas, cu mester a wordo elimina sino Aruba lo a haya su mes riba otro lista preto. E mandatario no ta haya cu e noticia mester a haya un ‘boost out’ den prensa (international) manera cu a sosode.