Cu ayudo di helicopter a logra para chauffeur di hit & run

ORANJESTAD – Cu ayudo di e helicopter di polis, autoridad a logra pone man riba un chauffeur di un Toyota Corolla, cu a causa un persecucion largo diaranson anochi. Tabata na altura di Piedra Plat, ora cu e chauffeur di e Toyota a ‘hit’ e auto Kia di e compania Pizza Hut y ‘run’. E chauffeur di e auto di Pizza Hut no a basila y a sigui e Toyota Corolla. Polis tambe a wordo poni na altura cu a cuminsa cu un persecusion. E chauffeur di e Toyota tabata core hopi irresponsabel y a bay te Sta Cruyz, Jan Flemming sigui pa Rooi Frances y a bin caba te na Sabana Basora. Danki na e helicopter cu por a sigui e Toyota, ya cu esaki tabata core cu un velocidad hopi duro. Tabata te na altura di ex edificio di DTI cu a logra para e chauffeur di e Toyota, y detene esaki. Mester bisa tambe cu durante e persecusion, un auto di polis cu tabata na caminda pa e persecusion, a haye den su propio accidente ora cu un otro chauffeur no a duna preferencia na e polis cu tabata cu sirena e velocidad halto. E polisnan a keda herida levemente pero nada grave.