Seleccion U17 di futbol di Aruba ta logra di dos victoria na Merca

BRADENTON, FL  - Despues di e vence Bahamas 3 - 0 den e prome wega, Aruba mester a hunga nan di dos partido contra di Saint Marten(Fr) den e clasificacion Concacaf U17 World Cup 2019, na Bradenton Florida.  Mester bisa cu Aruba a inicia na e wega den un forma tremendo unda nos muchanan a sali anota dos gol tempran y bay ariba 2 - 0 pa medio di golnan anota pa Roland y Julian Arends. Pero un error innesecario den e defensa di Aruba a pone Saint Marten corta e ventaha na 2 - 1. 

Den e di dos tempo e wega a bira uno emocional cu hopi tension caminda e hungadornan di Saint Marten cada bes tabata busca e infraccion na un lugar peligroso den e area defendi pa portero Eisden. Esaki sin duda a irita e hungadornan di Aruba masha hopi mes unda ta reclama e refree riba esaki. E ekipo di Saint Marten Frances a pone basta presion pero no a logra hinka gol pa empata e partido. Pero despues Aruba ta anota un bunita gol pa medio di un cabezaso di Milan Akermans pa e 3 - 1.  Asina tambe Aruba ta logra acumula 6 punto despues di nan di dos victoria faltando un wega mas.Diasabra Aruba lo hunga contra di nos isla ruman Boneiro. NOTA: Texto cortesia 297sports.com y potret cortesia Nilton Laclé