Fundacion Zinnia cu varios producto nobo pa sigui concientiza coremento bou di influencia

ORANJESTAD - Despues di e gran exito di bus di Fundacion Zinnia durante e dos paradanan grandi di Carnaval, e team dinamico a sigui cu mas proyecto, pa conscientisa nos hendenan tocante core bou di influencia di alcohol y su consecuencianan. E caminda ta largo, pero Fundacion Zinnia ta keda positivo, cu poco poco nos hendenan ta bira consciente di e limite di nan bebemento y core bou di influencia. Ta bon pa remarca cu e producto ‘breathalyzer’ a haya un bon acogida den e periodo di Carnaval, ya cu Fundacion a busca 1000 di nan y a logra bende 750. 

‘Single use breathalyzer’

Esaki ta un producto procedente di Canada y ta aproba pa e agencia federal di salud (F.D.A.) Ta trata di un test cu por cumpra pa solamente  Awg.5,- y ta midi tres nivel di alcohol; 0.5% cu ta permitibel pa ley te cu 0.8%, unda cu bo por perde bo rijbewijs. Intencion di e test personal aki ta, pa uno mes bira consciente y responsabel pa haci e test y tuma decision si e ta core auto of no. Na momento cu bo realisa cu bo no por core auto door di loke e test a duna como resultado, bo por yama un hende pa bin busca bo y asina evita di core bou di influencia. Polis tambe ta hopi contento cu e producto aki y nos hendenan sigur a duna sosten door di cumpra e producto y haci bon uzo di dje. 

Producto nobo

Banda di esey, Fundacion Zinnia tambe a bin cu otro producto pa sigui plama conscientisacion di core bou di influencia y a bin cu algun producto nobo, manera: mugs, t-shirt y tanktops. Dia di Himno y Bandera e productonan aki a haya un bon acogida y nos hendenan ta demostra interes pa cumpra e productonan, mirando e mensahenan cu nan tin. 

Fundacion Zinnia a gradici un y tur pa duna nan sosten y lo sigui traha incansablemente pa conscientisa nos hendenan tocante coremento bou di influencia, specialmente mirando cu ainda tin hopi hende cu no ta para keto na e consecuencianan cu esaki por tin tanto pa nan como e famianan en cuestion.