Independisacion di Directie Luchtvaart posponi

ORANJESTAD – E independisacion di Directie Luchtvaart ta wordo posponi pa 1 december enves di diasabra awor 1 di november. Minister di Transporte Otmar Oduber a confirma na NoticiaCla.com cu dificilmente por a cuminsa, mirando cu ainda parlamento no a ni trate ainda. Tanten, no por cuminsa cobra aerolineanan extra placa, y e operacion mester warda por lo menos un luna mas prome cu e parti nobo, conoci como Ansa (Air Navigation Services Aruba NV.), lo por traha. E concepto di ley ta uno controversial, for di punto di bista di Raad van Advies (Rva), y a desbarata esaki cu por lo menos 24 punto. Mes momento, e pensamento ta cu gobierno a pone tur e comentarionan un banda y cu por deduci esey den e contestanan di gobierno riba e conseho di RvA. De hecho oposicion lo a pidi pa RvA duna un conseho nobo, riba e cambionan cu gobierno a incorpora, of no riba esaki. No obstante esaki, Oduber ta sigura cu tur cos ta ok y cu pa 1 di december, tin speransa cu por introduci e departamento ‘nobo’ aki.

Ora cu e ley aki a pasa serca Raad van Advies, e la bin bek ,- cu loke hopi ta considera-, cu e conseho mas negativo y pisa cu a conoce riba un concepto di ley. No menos cu 24 punto tabata cuestiona practicamente tur e aspecto di e funcionamento di e ley (lesa e ley y tur documento relata na esaki aki) , y RvA a te hasta manda e conseho final pa ‘no manda esaki pa Staten’. “Mi no sa si tin tanto punto negativo” Oduber a reacciona na NoticiaCla.com riba e reaccion di Raad van advies. Segun Oduber, tin hopi ‘cuestionamento’ di parti di Raad van Advies riba e departamento nobo aki. Loke segun Oduber, RvA a pidi, ta mas claridad y riba cada un di e puntonan, Oduber ta sigura cu a duna esaki.

“Bo lo mira den e verslag tambe, cu cada un di e puntonan aki cu tabata pregunta, nos a atende cune” Oduber a sigui bisa. Tambe tabatin un 4 pa 5 punto cu ta esun mas ‘wet technische ‘, cu ta puntonan cu a tuma over tambe den e ley manera cu RvA a sugeri. Como tal , Oduber ta desmenti na NoticiaCla.com cu a deshaci y pone e consehonan un banda, manera ta wordo bisa. Entre e preguntanan cu Oduber ta splica ta e pregunta di Rva di pakico a scohe un otro ‘nv’ pa pone e compania resorta bou di dje. Oduber ta sigura cu a duna ‘toelichting’ riba tur punto sin excepcion, prome cu a mande pa parlamento. “Como tal nos no a entrega e ley manera cu e tabata, y nos a tuma 100% di e sugerencianan y cambionan cu a wordo presenta pa Rva” Oduber a bisa.

E intencion tabata pa cuminsa pone e compania aki funciona entrante 1 di november 2014, esta diasabra awor, pero esaki ta algo imposibel. Esey ta pone cu e cobransanan cu ta tuma lugar pa e aerolineanan no por tuma lugar mas. A notifica e aerolineanan caba cu esaki no ta cuminsa 1 di november mas. Oduber ta admiti cu e tardansa aki ta haci e trabou cu e aerolineanan dificil. “Mi no ta nenga esey” Oduber a bisa. “Bo ta deal cu hopi partners. Mas cu 4 luna pasa nos a notifica partnersnan pa splica nan riba e cambio aki y ta transparente riba e cobransanan aki” Oduber a bisa. Di nan tur, tabatin entre 4 pa 5 aerolinea cu mester a atende individualmente pa por a convence nan, via un conference call. “No ta facil pa cambi’e sin mas. Pero a notifica tur aerolinea cu no ta cla pa cuminsa cobra esaki ainda”. NoticiaCla.com ta atendiendo e asunto aki y ta pendiente di su tratamento den parlamento y tambe su ehecucion despues.