- KVK: Mayoria compania ta pensa cu e scarsedad di trahado lo empeora
- HOH: Ocupacion di cama poco poco ta bek na normalidad na hospital
- Video: Ryçond Santos do Nascimento ta considera su entrada den AVP como un eror
- Mas turista Colombiano ta biahando pa Corsou envez di Aruba den 2024
- Minister a anuncia mando nobo temporal na Cuerpo di bombero
AHATA su Conseho di Mucha a bishita compania turistico
ORANJESTAD - Alumnonan di klas 6B di Scol Primario Kudawecha ta tumando parti den e program di “Conseho di Mucha” cu nan proyecto pa soluciona un dilema presenta pa Aruba Hotel and Tourism Association (AHATA). Na Januari CEO di AHATA, Tisa LaSorte, a bishita Scol Primario Kudawecha pa presenta e dilema cu ta pa motiva persona local hoben pa traha den e sector turistico y sostene e pilar di nos ecnomia.
Na luna di Februari y Maart e alumnonan di klas 6B di Scol Primario Kudawecha a traha riba nan etapa di investigacion, y a bishita diferente stakeholder den e industria di turismo. Pa duna un bon conocemento di e industria y empleo den e industria, a siña nan tocante e variedad di trabounan disponibel den sector. E muchanan a scucha directamente for di empleadonan y gerencia tocante nan experencia den e industria y di nan amor pa e trabow. AHATA a organisa field trip pa e alumnonan di klas 6B por a bishita diferente compania miembro di AHATA, manera The Ritz-Carlton, De Palm Tours, Aruba Airport Authority, y Aruba Ports Authority.
E bishitanan a bay bon y Rene Kannegieter, docente na Scol Primario Kudawecha, a bisa cu e alumnonan a mira hopi diferente aspecto di Turismo y tabatin oportunidad pa hasi hopi pregunta. De Palm Tours N.V. a sorprende e alumnonan y busca nan den un jeep. Na De Palm Tours N.V. a siña hopi, mientras cu na Aeropuerto a cera conoci kico ta e proceso cu e pasahero ta pasa aden, desde comienso te final. Na Ritz-Carlton tambe nan a ricibi hopi informacion y tabata interesante.
AHATA a organisa un bishita na Aruba Ports Authority tambe, unda nan a ricibi un rondleiding educativo. E informacion na APA a interesa alumno Vince Ramara masha hopi mes, y e la expresa interes den traha como capitan di boto. Maria José Salazar-Salazar di klas 6B di Scol Primario Kudawecha, a gusta e bishita na Aeropuerto Reina Beatrix, pasobra nan a ricibi splicacion di e proyectonan di ampliacion pa aki 10 y 20 aña. Otro alumno, Elijah Wester, tambe a haya bishitanan hopi leuk y e ta desea di traha den un hotel un dia y bira un general manager. Tanya Jiandani, studiante di klas 6B di Scol Primario Kudawecha, a haya e bishitanan hopi interesante y ta sinti awor e sa con e por yuda AHATA cu e dilema. Su grupo lo repasa tur informacion cu nan a haya pa prepara un presentacion interesante pa AHATA y purba motiva Arubianonan hoben pa bay traha den hotel y turismo.
Como parti di e investigacion di e alumnonan, AHATA a invita John Wardlaw, Dean Faculty of Hospitality & Tourism Management di Universidad di Aruba pa duna un presentacion na e alumnonan di klas 6B. A siña nan e diferencia entre hospitalidad y Turismo y e importancia di nos localnan den sector turismo. Tambe a ricibi hopi informacion valioso pa nan investigacion y conocemento general relaciona cu e industria y estudio academico necesario pa traha den sector di turismo. E alumnonan a demostra gran interes pa tur aspecto presenta na nan.
HOH: Ocupacion di cama poco poco ta bek na normalidad na hospital
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
Stampiaaruba cu exposion di stampia na Aruba pa celebra 17 aniversario
Oficina principal di DIMP ta cera awe diaranson pa mantencion
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
Den cuadro di reposicionamento, FPNA ta cambia su nomber pa Aruba Conservation Foundation
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
Parlamentario Ryçond Santos Do Nascimento ta invitado den Noticiacla LIVE awe nochi
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
AZV: Contracto cu dentista Mayra Rosales ta termina
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.
Follow NoticiaCla
