VP Raad van State: Speransa y confiansa cu cuestionan di Aruba actual lo keda soluciona

Den Haag – Presidente di Staten Marisol Lopez-Tromp a reuni cu vice presidente di Raad van State Piet Hein Donner na Hulanda. E combersacion a bai ariba e relacion den Reino en general, pero naturalmente a papia tambe ariba desaroyonan actual. ‘Nos no a papia ariba cuestion nan specifico cu na e momento aki ta hunga entre e gobiernonan di e paisnan den Reino. Raad van State - como e organo di conseho mas halto den Reino - ta para ariba tur partido y pesey e ta tuma un posicion neutral. Sinembargo como presidente di Staten no ta su lugar pa hunga politica. Mi ta representa porcierto tambe e partidonan di oposicion,’ Lopez-Tromp a bisa na final di e combersacion.

‘Sr. Donner y mi persona ta comparti e mesun opinion cu un bon entendimento ariba tur nivel entre paisnan den Reino ta na interes di e pueblonan. Nos ta carga e speransa y confiansa cu e cuestionnan cu ta andando awor aki, pronto lo yega na un solucion satisfactorio cu lo ta na benificio di tur partido. Nos a papia tambe ariba e rol y importancia di Raad van State. Sr. Donner a segura mi cu Raad van State na tur momento ta dispuesto pa, dentro di e marco nan existente, contribui na un desaroyo positivo di Reino y e relacion mutuo. Den pasado varios biaha a keda demostra cu e consehonan balansa cu Raad van State a yega di duna, semper tabata basa ariba un conocemento grandi di e materia; consehonan bon funda, cu interes di tur partner den Reino na pecho.’

E vice presidente di Raad van State a mustra interes grandi den e proceso di independisacion cu Staten di Aruba ta pasando den dje. Tambe e proceso di fortificacion di e institutonan independiente na Aruba. Presidente di Staten Lopez-Tromp cu satisfaccion ta mira bek ariba un combersacion informativo, pero sigur tambe uno hopi placentero. ‘Sr. Donner den pasado a desplega diferente cartera ministerial y den cuadro di esaki e ta envolvi hopi cu e partinan Caribense di Reino Hulandes. E tin recuerdonan masha bunita mes di su bishitanan di trabao na Aruba y tabata curioso na e desaroyonan na Aruba.’ Foto ta cortesia di Nico van der Ven.