Helicopter pa polis a yega Aruba diasabra merdia

NOORD – E helicopter pa polis cu gobierno di Aruba a firma un MoU un dia anterir, a yega Aruba diasabra merdia. Manera indica el a yega un dia despues cu e mester a keda presenta oficialmente na comunidad. Pa motibo di problema di permiso pa bula den espacio aereo Venezolano, cos no a sigui ayera. Pero diasabra (awe) esey a keda regla cu a pone cu pa merdia e helicopter a ateriza na aeropeurto di Aruba, busca Minister President Evelyn Wever Croes y Minister Andin Bikker (Husticia) y sigui pa Kazerne di bomber na Tanki Flip, cu lo bira e base di e helicopter. No ta prome biaha cu Aruba tin un helicopter pa polis, ya cu den pasado esaki tabatey caba. Solamente cu ora cu gobierno a cambia, a opta pa motibo di gasto y prioridad, no continua cu e servicio ey. E gabinete actual a opta pa trece esaki bek. 

ATERISAHE

Prome cu e helicopter a baha el a dal un buelta rond di e post y despues ta haci su aterisahe. Minister Bikker despues di a baha for di e helicopter a papia cu prensa riba e yegada. Ta trata di un helicopter bon ekipa pa yuda den cualkier caso di emergencia unda auto no por yega pero tambe yuda den mantene Aruba su frontera bon vigila. Segun Bikker den siman cu ta bin lo bay caba cu tur detaye pero te awor tur tramite pa tin un helicopter na Aruba ta bayendo bon. Pa loke ta e vuelo for di General Aviation pa Kazerne na Tanki Flip e tabata un vuelo hopi smooth segun  Bikker. Riba combinacion di foto por mira yegada y tambe momento cu Minister di Husticia mr. Andin Bikker ta pone e sticker/bandera di Aruba riba e helicopter.