Companianan Heavy Equipment cu otro deadline pa gobierno

ORANJESTAD – E grupo di compania cu ta opera heavy equipment, a duna gobierno (lesa minister Otmar Oduber:red) te diaranson otro siman, 20 di maart pa bin cu un update riba nan situacion di trabou. Si pa e fecha ey no a haya contesta, por spera un protesta atrobe, manera a haci biaha pasa, esta posibel blokeo dilanti Bestuurskantoor. Durante un conferencia di prensa, propietario di Cala Romana Patrick Bosset y Werner de Sousa a bisa cu nan no a tende nada mas di minister despues di nan reunion di dialuna ultimo. 

PROTESTA

E minister dialuna a invita un grupo di 6 persona di e grupo di 54 compania y a priminti un solucion. Entre nan, a bisa e representantenan cu nan mester a pidi un aanleg vergunning pa por a continua cu nan trabou di e.o. coba pa santo. Pero un dia despues a bin tende cu nan mester tin un hindervergunning tambe. “E ta mara nos atrobe” de Sousa a bisa. A mustra cu e prijs di material pa construi cas, ta bay subi, si importa material cu no por haya awor, debi cu no por coba mas pa haya e material localmente. A duna un descripcion detaya di tarifa di material y con esaki ta afecta prijs di construccion di cas y otro proyectonan. 

ROP Y GRUPO TA PEGA

Esey kier men cu e companianan no por sigui traha y ta pega. Hopi di esaki ta debi na e ROP (Plan Ambiental) nobo cu ta evita varios lugar di por usa pa coba pa santo. E companianan ta sinti cu nan ta wordo perhudica y kier un solucion. A duna e minister te diaranson pues, pa asina e companianan por sa ki paso nan tin cu tuma. No ta nada malo cu gobierno kier trece yen di proyecto Aruba, pero e mester por duna trabou tambe na e companianan, incluyendo esun chikito. Potret cortesia video: Masnoticia.com