Aardenburg: Utilities NV a fungi como un financiador di partido AVP
ORANJESTAD – Durante e periodo cu Frank Hoevertsz tabata na cabez di Utilities NV, gastonan a subi explosivamente, y a distribi placa. Tur cu aprobacion di e minister encarga cu energia e tempo ey. Asina abogadonan Anthony Ruiz y Thomas Aardenburg y Ruiz a pleita pa nan cliente Utilities NV diahuebs merdia. Utilities a opta pa retira Hoevertsz mesora, acusando e como e culpable pa e malgastamento di placa y no maneha un NV di gobierno conforme regla. Como retiro nan ta dispuesto pa dune un suma chikito como salida di e compania si mester, pero si ta pa Utilities, e no ta haya nada. Na final a pidi huez pa dicidi si e practica aki (di e forma con Hoevertsz a maneha e NV) tabata hustifica y si no, kico e ‘castigo’ pa algo asina mester ta.
PLUS ACCOUNTANTS
Abogado Aardenburg a splica huez cu e base pa e retiro di Hoevertsz tabata un resultado di un rapport di accounting Plus Accountants, unda cu esaki a mustra un bista financiero desastroso pa e NV, y mal maneho pa parti di e director, den e caso aki Frank Hoevertsz. Segun e abogado, Utilities (entre 2010 y 2017) a wordo maneha pa gobierno como e ‘financiado’ di partido AVP, e partido cu tabata na mando e tempo ey. Hoevertsz a keda apunta na comienso di e prome periodo di gabinete Mike Eman, sin un solicitud habri, cu un salario di AFL 22.000 florin mensual plus 25% toelage, auto bunita, telefoon vergoeding y un cantidad di beneficio mas cu tabata extraorbitante. E tabata haya 13 y 14e maand y un pensioen bon regla.
GASTONAN HALTO
Durante periodo cu Hoevertsz tabata na cabez di Utilities, el a sa di aumenta e gastonan enormemente, di centenares di miles, (a menciona suma di 400 mil florin te na algun miyon florin). Y e gastonan aki mester a wordo cubri parcialmente pa pago mas halto di dividendo di e companianan di utilidad Elmar y WEB.
AGENDA BERDE
Mayoria di e maneho di Hoevertsz, tabata basa riba e asina yama ‘agenda berde’, unda cu e tabata haya un cantidad di decision di minister (MB), cu e mester y tabata ehecuta. A usa e termino ‘agenda berde’ como un ‘grito general’, cu mester a cubri tur cos cu gobierno tabata haci y deshaci via Hoevertsz. Aki decisionan tabata wordo tuma entre minister y Hoevertsz, y tabata laga Hunta di Comisario completamente afor. A haci mencion di varios actividad organisa, manera e green conference annual, huur di jet priva pa por a haci deal cu PDVSA, y asina tin un sin fin di cosnan cu Hoevertsz ta wordo culpa di dje. “E tabatin for di Aruba 3 luna pa aña, cu tabata gasta mei miyon florin” e abogado a sigui mustra.
REVISTA
Loke a hala hopi atencion ta e hecho cu a paga dos biaha 19 mil pounds, (a haci mencion den corte di 45 mil florin) pa pone un aviso (tipo advertorial) di e ‘e tempo ey’ Prome Minister Mike Eman den e revista NEWSWEEK. Cosnan cu segun Utilities, simplemente no ta posibel. E forma con Hoevertsz a maneha e compania, e placa cu el a gana, y e placa cu el a gasta na nomber di e compania, simplemente tabata un abuso, pa cual Hoevertsz simplemente no por a keda mas y mester paga pa e loke el a haci. Huez ta tuma decision 2 di april.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
