Aruba ta mehora su posicion cu un punto riba lista di sostenibilidad den Caribe

ORANJESTAD – Aruba a subi di posicion 4 pa posicion 3 riba e lista di ranking di paisnan relaciona cu nan sostenibilidad di medio ambiente. E rapport actualisa, traha pa PriceWaterhouseCoopers (PWC), a keda presenta inicialmente durante e siman di e Green Conference Europe Meets the Americas pa Abel Scholtens di PWC, unda cu eynan Aruba ainda a figura como number 4 riba e lista. Mientrastanto esaki a cambia, debi cu a haya cifranan actualisa di e situacion di e CO2 cu a resulta di ta mucho menos cu anteriormente raporta. Aruba como tal ta subi di posicion 4 te na posicion number 3 di paisnan cu ta score miho den Caribe.

E meta di e rapport, manera presenta pa.. tabata pa mira unda Aruba ta figura entre un grupo di 10 isla den Caribe, riba e tereno di sostenibilidad. E islanan escohi ta Aruba, Corsou, Bonaire, St Maarten, Cayman Islands, Bahamas, Barbados, Trinidad & Tobago, St Kitss y Puerto Rico. Esun cu a score mas halto y ta na prome lugar, ta Cayman Islands, y esun mas ‘malo’ tabata Trinidad y Tobago. Bonaire a score miho cu Aruba na number 2 y Corsou mas ‘malo’ cu Aruba, na posicion 5.

Loke a yuda Aruba subi di posicion ta e cifra di CO2, cu riba e rapport inicial tabata 22.8 mientras cu a reduci esaki te na 11.07. Esaki a mehora Aruba su posicion considerablemente segun e rapport.

Pa e rapport a usa e siguiente criterianan riba cual a husga e islanan. Entre nan ta figura Clima, Tera, Oceano, Energy (uso y reusable), Awa, Desperdicio (uso y reusable). Basa riba con e isla ta figura riba e terenonan aki, a cualifica nan riba e lista final manera computa y raporta. Riba Clima, a check e uso di CO2. Pa tera a check e cantidad di tereno cu ta protegi (Aruba tin Parke Arikok raporta solamente como tereno protegi). Energia ta e cantidad di coriente cu ta wordo uza, y tambe e parti reusable. Awa tambe ta riba cantidad uza, y e parti di desperdicio, cuanto di esaki ta cantidad uza y cuanto ta reusable. Aruba riba esaki a score como lo siguiente CO2, (11.07), Tera (18%), Oceano (0%), Awa (43m3), Energia limpi (11%), Uso Energia regular (7091 kwh) y desperdicio (2.34kg p/capita)

Loke a sali na cla, ta cu tur e islanan a mustra un variacion significante di e otro. Unda cu un isla a score halto pa un indicador, e ta score abou den un otro area. Ningun a score halto riba tur indicador. Como tal no tabata cla cua e leader ta ora cu ta trata di e parametro nan di sostenibilidad di medio ambiente den e region caribense. Por conclui segun esnan cu a haci e investigacion, cu mayoria di e paisnan aki a aloca nan recursonan den un of dos area y a ignora e otro area di sostenibilidad. Aruba p.e a enfoca fuertemente riba e iniciativa di energia sostenibel, y ta den e top tres ora ta papia di energia berde. Pero e ta faya den areanan manera proteccion sostenibel riba area di tera y oceano. Tin asuntonan cu ta ‘atrasa’ den cifra, y of inconsistente. Of simplemente no disponibel. No obstante esey, cada pais (incluyendo Aruba) ta mustra mehoracion riba tereno di sostenibilidad. (Por lesa e ultimo rapport emiti diahuebs aki)