KVK: Empresarionan preocupa cu concepto di R.O.P. nobo

KVK: Empresarionan preocupa cu concepto di R.O.P. nobo

Posted on 03/13/2019 6:39 pm AST | Updated on 03/13/2019 6:41 pm AST

ORANJESTAD – Durante e evento recien di Camara di Comercio (KVK) esta e Town Hall Meeting, empresarionan a mustra hopi preocupacion relaciona cu e ROP nobo. Asina e gremio a laga sa den un comunicado diaranson atardi. Segun Kvk, diamars 12 di maart 2019 den un auditorio completamente yen Camara di Comercio y Industria di Aruba (KvK) a organisa su Town Hall Meeting riba e topico di ROP. KvK a keda hopi satisfecho cu e gran presencia mirando cu esaki ta indicacion cu e concepto di ROP tin hopi aspecto cu mester mas claridad of cu pueblo no ta di acuerdo cune. KvK su intencion pa e evento no ta pa duna un presentacion of duna comentario riba e concepto ROP pero pa scucha y tuma nota di tur e opinionnan di esnan presente. KvK tin un carta di zienswijze caba den preparacion, y lo inclui e puntonan cu resalta durante e Town Hall Meeting den su carta. KvK kier gradici tur esnan presente pa comparti nan pensamento y di e forma aki expresa e preocupacionnan cu ta reina den pueblo y en particular e comerciante encuanto e concepto ROP.

Kawish Misier presidente di directiva di KvK a habri e anochi cu un introduccion cortico encuanto e ROP. E la elabora kico KvK a haci te cu awo encuanto e concepto ROP y a splica cu e intencion di e Town Hall Meeting ta pa KvK por haya mas informacion riba e punto di bista di comerciante chikito, mediano y grandi, propietario y pueblo en general. KvK no a organisa e evento pa trece su puntonan dilanti cu lo bay hinca den e carta di zienswijze di KvK pero pa scucha y evalua e puntonan cu ta wordo treci dilanti durante e anochi y agrega esakinan na loke KvK tin caba pa duna esaki un base mas solido y substancia cu informacion actual. KvK a brinda e oportunidad pa nan expresa nan puntonan den un forma habri y pa bin cu sugerencia con pa mehora e concepto ROP.

Puntonan remarcabel di e Town Hall Meeting riba e ROP

E punto cu mas a resalta segun KVK, ta e preocupacion cu ta reina den comunidad riba e forma con e proceso ta cana. Hopi ta sinti cu nan no ta wordo scucha of tuma na serio. E ta alarmante cu ora di busca informacion encuanto e ROP no ta haya asistencia adecuado di e instancia concerni. A wordo splica cu ta comosifuera e plan ta wordo impone sin consulta e comunidad cu ta biba den cada bario y districto  rond Aruba. Tambe a haya keho cu na momento hende bishita oficina di DIP durante e periodo di inzage no ta haya informacion of ayudo pa aclarea puntonan di e ROP. Varios hende a aserca DIP pa por confirma si nan tereno ta cay den un zona particular pero pa e informacion aki nunca por a haya un empleado di DIP pa brinda servicio. E mapanan ofreci no ta suficientemente detaya.

Un otro punto di preocupacion interesante segun e gremio, ta cu nunca a sali na cla cu a haci un analisis di loke a sosode desde e ROP anterior di 2009 te cu awo cu nos ta na e punto di desaroya un ROP nobo 10 aña despues. Pueblo kier sa cuanto violacion riba e ROP 2009 a tuma luga, cuanto ontheffing a wordo otorga y ki conseho of evaluacion si a wordo efectua di parti di Algemene Rekenkamer entre otro encuanto e ROP anterior. E pregunta cardinal cu pueblo kier contesta riba dje ta: a base di ki datos, criteria y otro cifranan statistico a desaroya e ROP nobo aki? Fuera di tur esaki e comerciante y pueblo presente a puntra pakico KvK no ta den e Raad Ruimtelijk Ontwikkeling (RRO) pa asina representa tambe tur e 17 mil companianan cu tin registra na Aruba. Hopi ta mira KvK como nan representante y nan voz pa trece nan preocupacionnan dilanti cerca gobierno.

Diabierna dia 15 di maart 2019 ta fecha final di entrega carta pa zienswijze. Mirando e preocupacion cu ta existi, pueblo ta opina cu mester duna e oportunidad pa tin claridad riba nan preocupacion mirando cu e ROP lo tin un duracion di 10 aña y esun anterior no tawatin un ROPv cu ta haci cu no tin reglanan ni leynan na cua mester tene na nan pa proteccion di naturalesa por ehempel. Pa e motibo aki tambe tur presente unanimamente ta opina cu nan ta desea di mira cu e fecha wordo posponi cu suficiente tempo mas y duna mas tempo mirando e impacto cu e ROP tin pa e siguiente decada.

KvK lo inclui puntonan treci dilanti den su carta di zienswijze y lo entrega esaki conforme e pasonan na cua e procedura ta describi. Lo bay inclui e peticion y e ta keda na gobierno di Aruba pa tuma decision na bienestar di e comunidad di Aruba.

  • Aruba Bank ta lansa su campaña di Cuenta di Studiante

    Aruba Bank ta lansa su campaña di Cuenta di Studiante

    ORANJESTAD –   Aruba Bank a lansa su campaña di Cuenta di Studiante pa tur studiante di Aruba, sea e studiante lo continua cu su estudio den exterior, of si e lo continua cu su studio na Aruba mes. E Cuenta di Studiante ta ofrece e studiante hopi beneficio, entre otro e lo ricibi su propio Aruba Bank Mastercard Debit cu Maestro pa haci compras local, internacional y tambe Online 24/7/365, tambe e studiante lo tin acceso pa haci uso di e Aruba Bank App, y hopi mas.

  • A logra evita bancarota di establecimento La Linda

    A logra evita bancarota di establecimento La Linda

    ORANJESTAD – Tin indicacion cu e establecimento La Linda a scapa un bancarota. Asina NoticiaCla a compronde di un di e abogadonan encarga Peter Mohamed. “La Linda ta finalisando un areglo cu abogado di e trahadonan”. Manera ta conoci, tabatin un situacion basta fastioso deslumbrando, unda cu tur cos tabata mustra cu esaki lo tabata e final di e compania. Pero esaki menos mal a keda regla y cu por a evita un situacion di bancarota. Pa varios luna tabatin un incertidumbre pa e trahadonan cu tin hopi pero hopi aña trahando cu e compania. Tabatin un duda si e compania ta sobrevivi e crisis cu a surgi dado momento ora cu un di e doñonan a fayece. Dado momento a logra reestablece un situacion di tal forma cu e negoshi por a cuminsa opera atrobe aunke di forma modera.   

  • Lotto cu chens pa bo gana 570 mil florin cu Mega Plus awe!

    Lotto cu chens pa bo gana 570 mil florin cu Mega Plus awe!
  • AHATA: Na Mei mayoria di hotel a experiencia un tiki menos ocupacion

    AHATA: Na Mei mayoria di hotel a experiencia un tiki menos ocupacion

    ORANJESTAD - Aruba Hotel & Tourism Association (AHATA)  a acumula e cifranan di ocupacion y prijs di hotelnan pa luna di Mei 2019 y CEO di AHATA Tisa LaSorte a anuncia cu na Mei por mira e ocupacion baha un tiki. Aruba su turismo a experiencia extra crecemento desde e horcannan di September 2017 den Caribe, y awor cu e inventario den Caribe ta habriendo bek ta di spera cu demanda pa Aruba lo normaliza poco poco. Mientrastanto tin bon demanda ainda, pa cual motibo mayoria di hotel por cobra un tarifa mas halto, aunke e balornan den luna di Mei ta mas abou cu e lunanan di high season. 

  • CAFT ta cancela biahe pa Aruba debi na cambio di LAFT

    CAFT ta cancela biahe pa Aruba debi na cambio di LAFT

    ORANJESTAD – E cambio di ley di LAFT a conoce su prome efecto, casi un siman despues cu Parlamento di Aruba a cambia e ley cu pasonan fundamental. E colegio di supervision financiero di Aruba CAFT ta mustra gobierno diaranson riba incumplimento di e protocol firma aña pasa y ta mustra cu nan prome accion ta consecuentemente pa pospone nan bishita proximo pa Aruba. 

  • Maduro: No a dicidi ainda si ta introduci sugar tax na Aruba

    Maduro: No a dicidi ainda si ta introduci sugar tax na Aruba

    ORANJESTAD – Gobierno no ta logra introduci e asina yama ‘sugar tax’ pa 1 di juli 2019. Asina minister di Finanza Xiomara Maduro a confirma pa NoticiaCla. De hecho, no ta sigur mes cu e sugar tax lo keda introduci como un di e impuestonan ‘vicioso’. Esaki pasobra simplemente no a tuma un decision final riba e asunto segun Maduro. Cu e introduccion aki, e impuesto lo mester a genera 16 miyon florin extra pa caha di gobierno. Algo cu awor no ta parse di ta algo sigur. 

  • Powered by SETAR