Partido AVP a convoca un manifestacion nacional contra Gobierno

ORANJESTAD – Partido AVP a convoca un manifestacion nacional pa diabierna 12 di april proximo. Asina e lider di partido Mike Eman a bisa diamars anochi durante un encuentro na nan cede principal, Cas di Partido. Durante e reunion, Eman a pidi sosten di esnan presente y mandato pa tene e evento riba e dia ey. E motivacion di e partido, ta pa forza Gabinete Wever Croes stipula un fecha pa eleccion nobo. “Nos no lo bay di eynan sin haya un fecha” Eman a sigura tur esnan presente. E fecha stipula pa ley di e siguiente eleccion Parlamentario ta pa september 2021. No ta conoci si esaki ta loke Eman ta referi, of si e kier un fecha diferente, esta mas tempran.  Segun Eman, ta considera cu e Gabinete Wever Croes a comete asina yama ‘kiezersbedrog’ door di no cumpli cu varios di e promesanan di campaña. Y e situacion a empeora segun e ex prome minister a sigura esnan presente. Fuera cu ta dia 12 di april y cu nan lo marcha bay dilanti Bestuurskantoor, no a participa e orario ni mas detayes.