Segun Ruiz pa falta di tempo y capacidad, Aruba ta riba lista preto awor

NEW YORK/ORANJESTAD – For di New York diamars mainta, Minister di Finanza Xiomara Ruiz Maduro a admiti na NoticiaCla cu pa motibo di tempo y capacidad di personal, Aruba awor enberdad ta riba lista preto di Union Europeo pa motibonan fiscal. Un ley fiscal cu mester a pasa den Parlamento, cu no a pasa ainda cu por a remedia e asunto, awor ta pone cu nos ta riba e lista preto. E mandatario ta spera cu Parlamento por pasa e ley aki pronto pa asina na Mei ainda di e aña aki, Aruba por wordo kita di e lista preto aki. Ta trata di un ley cu a drenta Parlamento 1 di maart 2019 y ta trata tres articulo. 

KICO A PASA

Segun e mandatario, e ley cu tin cu evita e asunto fiscal, ta na Parlamento pero no a wordo trata ainda. “Aruba su problema den esaki ta e falta di capacidad pa por traha ley” Ruiz a bisa. Tin hopi ley cu ta pendiente. “Nos no tin suficiente hende pa traha ley na Aruba y door di cu tin proyecto grandi a tuma lugar recientemente (e.o. presupuesto 2019, reforma fiscal), ta tuma hopi capacidad huridico cu ne. Eesy a pone cu algun proyecto a keda sin wordo finalisa na tempo” Ruiz a sigui splica. Y un di nan ta esun aki cu su concepto ta na Parlamento. “Pero esaki a yega Parlamento dos siman pasa pero no por a wordo trata ainda. Y esey ta trece cune cu ya tin deadline internacional, cu lamentablemente nos no por a cumpli cu nan” Ruiz ta sigui admiti. Y esaki ta e resultado, pues cu Aruba ta riba e black list. 

E LISTA

Segun Ruiz, Union Europeo ta ponebo riba e lista pero ya na Mei tin un posibilidad cu bo por wordo kita di e lista, (de-listed), na momento cu bo por presenta e resultado. “Den e caso aki nos ta spera di por conta cu e cooperacion di Parlamento pa asina aki e ley por pasa pronto y asina nos por cumpli y manda e informacion y e ora ey esaki wordo kita” Ruiz a sigui bisa. 

REGALO MIYONARIO 

Mes momento Ruiz a sigura NoticiaCla cu esaki no ta pone e suma di 13 miyon euro cu recientemente e mandatario a firma pe na Tahiti, na peliger. Ta dos cos totalmente diferente unda cu un no tin nada di haber cu e otro. E suma ey ta pa financia un curiculo nobo na Universidad di Aruba cu ta hiba e nomber di SISSTEM Faculteit.

E LEY

NoticiaCla tin e concepto di ley den su poder, cu ta mustra cu esaki a drenta 1 di maart ultimo, cu ta trata 3 articulo cu mester wordo cambia. Lesa e ley AKI.